[HaMaDa-ToUBaR]

المشاركة الأصلية كتبت بواسطة AbOnOrA تسلم ايدك يا باشمهندسة على انتقائك لموضوع يحمل رسالة قيمة جداً ان لم تكن اهم رسالة فى حياة الاباء والامهات اسمحيلى كمان استفيد من خبرة حضرتك بشكل عملى اكتر انا اولادى لسه صغيرين بس بحاول يكون الحوار اهم وسيلة فى التربية وللاسف فيه اباء وامهات فاكرين ان الحوار هو اعطاء الاوامر وفرض النواهى فقط وده مسموش حوار اصلاً الحوار يبداء باستيعاب شخصية الولد او البنت وتحليل احتياجاتهم ودوافهم ومن ثم التفاهم معاهم على الاساس ده بمعنى كلمة التفاهم مش بالأمر والنهى وفقط اسلام ابنى (KG2) كان عندة مشكلة فى انه طول اليوم مش عايز يقلع البنطلونات الجينز او لبس الخروج عموماً ولازم مامتة تعمل معاه مية مشكلة علشان يقعد بلبس البيت العادى وكانت ممكن تلبسه ويروح من وراها يغير هدومة تانى ويلبس تى شيرت وجينز وطبعاً مامتة كانت بتتجنن منه وكانت ممكن تضربه علشان كده وهو زى اغلب الولاد بيعند اكتر حوارى معاه بداء بتفهم احتياجاتة ودوافعة زى ما قولت ومتدخلتش بالأمر او النهى فى الموضوع خالص الا لما افهم ليه بيعمل كده واللى فهمته انه بلبلسه للجينز بيدافع عن هويته كولد اكتر لان اخواتة بنات وهو عايز يبقى لابس زى بابا وطبعاً اغلب الوقت بيشوفنى بلبس خروج فعلاً وانا فعلاً بقعد فى البيت بالجينز ... كمان اكتشفت ان اكتر لبس البيت بيبقى حاجات اطفالى متشابهه او مطابقة لنفس الطقم بتاع اخواتة البنات وديه غلطة فعلاً بقينا ناخد بالنا منها بعد كده بعدها قعدت معاه وفهمته انى بلبس الجينز بس لما بروح الشغل وانى هاخدة معايا الشغل اكتر ويلبس جينز زيي بس لازم تفهم ان فيه شغل كمان بيتلبس فيه لبس قماش زى البدل مش انت بتحب تلبس بدلة (هو فعلاً بيحب البدل) فاولاً مسحت من دماغة ان الجينز هو بس لبس الخروج وفهمته كمان ان انا بحب اشوفه فى البيت لابس لبس البيت علشان يبقى ولد شاطر وجميل وبعد كده بقيت انا نفسى اخد بالى مقعدش فى البيت بلبس الخروج وخلصت المشكلة على كده كده انا فاهم صح يا باشمهندسة ؟؟ المشكلة انى حاسس او عندى ثقة ان التعامل مع تربية الولد بالنسبالى اسهل بكتير لكن تربيه البنات والتفاهم معاهم حاسس انه صعب جداً على اى اب فى رايك الى اى مدى ممكن الاب ينجح فى تربيه بناتة من منطلق التفاهم ونفس الكلام بالنسبة للام والاولاد الصبيان ؟

ههههههههههههه والنبى انت برنس يا استاذ وائل ... سياسى مخضرم قدييييييم

انا والدتى كانت تقولى لو مغيرتش هدومك هتبات ع السلم .... حبيبتى هى

بس بجد فعلا يا استاذ وائل صاااااحبة جدا حاول دايما تعتبرة صاحبك وفى نفس الوقت لازم يكون حاجز الاحترام موجود

انا بالنسبالى للاسف مكنتش علاقتى بوالدى قد كدة للاسف انا وحيد وهما بيخافو عليا جامد وقافلين عليا لحد ما روحت الجامعة .. وطبعا شخصيتى اتغيرت نهائى بطبيعة الحال الواحد بيتحمل مسؤلية نفسة وعايش لوحدة

لما كنت فى الجامعة انا الى قربت من الوالد وحاولت اصاحبة .. وفعلا دة نجحت فى كدة ومش عاوز اقولك دى كانت راحة بالنسبالى قد اية فى كل امورررى

الفكرة الى عاوز اوصلها لحضرتك من كلامى دة ان زى ما انت بتحاول تكون صاحب ابنك علشان خايف علية وعلشان تحمية وعلشان سخصيتة تكون كويسة ... هو كمان بجد هيبقى محتاج دة اووووى

وبالنسبة للبنات يا استاذ وائل لازم يحسو بالامان والحنان ولازم البنت تحس انك عندك الاستعداد انك تسمع قصصها مهما كانت تافهة من وحهة نظرك او دلع بنات وخلافة بس بصراحة هى صعبة ... انا بحاول مع اختى كتير بيبقى صعب يمكن هما بيحسو ان احنا كذكور صعب علينا نتفهم احساسهم ...

ممكن بنت تخاف تحكى لاخوها ان فى ولد حاول يكلمها او حاول يقرب منها ليعملها مشكلة وانة مش هيفهما فالبتالى تفضل انها تتكلم مع اصحابها ( اعتقد انك لازم تعودها من صغرها انها تحكيلك تفاصيل يومها علشان تبقى عادة عندها ولو شوفت حاجة غلط حصلت يبقى متزعقش ولا تعلى صوتك .. تكلمها بحكمة وتفهمها واحدة واحدة ولو عندها رأى تسمعة منها علشان تبقى دايما عندها الاستعداد انها تحكيلك )

وزى ما البشمهندسة قالت الاسرااااااار اقصر طريق للصداقة

وربنا يخلي كل الاباء والامهات الى بجد بيستحملو المر علشانا

معلش بقى طولت عليكم

سلاااام عليكم