[Eng/salwa]

المشاركة الأصلية كتبت بواسطة AbOnOrA تسلم ايدك يا باشمهندسة على انتقائك لموضوع يحمل رسالة قيمة جداً ان لم تكن اهم رسالة فى حياة الاباء والامهات اسمحيلى كمان استفيد من خبرة حضرتك بشكل عملى اكتر انا اولادى لسه صغيرين بس بحاول يكون الحوار اهم وسيلة فى التربية وللاسف فيه اباء وامهات فاكرين ان الحوار هو اعطاء الاوامر وفرض النواهى فقط وده مسموش حوار اصلاً الحوار يبداء باستيعاب شخصية الولد او البنت وتحليل احتياجاتهم ودوافهم ومن ثم التفاهم معاهم على الاساس ده بمعنى كلمة التفاهم مش بالأمر والنهى وفقط اسلام ابنى (KG2) كان عندة مشكلة فى انه طول اليوم مش عايز يقلع البنطلونات الجينز او لبس الخروج عموماً ولازم مامتة تعمل معاه مية مشكلة علشان يقعد بلبس البيت العادى وكانت ممكن تلبسه ويروح من وراها يغير هدومة تانى ويلبس تى شيرت وجينز وطبعاً مامتة كانت بتتجنن منه وكانت ممكن تضربه علشان كده وهو زى اغلب الولاد بيعند اكتر حوارى معاه بداء بتفهم احتياجاتة ودوافعة زى ما قولت ومتدخلتش بالأمر او النهى فى الموضوع خالص الا لما افهم ليه بيعمل كده واللى فهمته انه بلبلسه للجينز بيدافع عن هويته كولد اكتر لان اخواتة بنات وهو عايز يبقى لابس زى بابا وطبعاً اغلب الوقت بيشوفنى بلبس خروج فعلاً وانا فعلاً بقعد فى البيت بالجينز ... كمان اكتشفت ان اكتر لبس البيت بيبقى حاجات اطفالى متشابهه او مطابقة لنفس الطقم بتاع اخواتة البنات وديه غلطة فعلاً بقينا ناخد بالنا منها بعد كده بعدها قعدت معاه وفهمته انى بلبس الجينز بس لما بروح الشغل وانى هاخدة معايا الشغل اكتر ويلبس جينز زيي بس لازم تفهم ان فيه شغل كمان بيتلبس فيه لبس قماش زى البدل مش انت بتحب تلبس بدلة (هو فعلاً بيحب البدل) فاولاً مسحت من دماغة ان الجينز هو بس لبس الخروج وفهمته كمان ان انا بحب اشوفه فى البيت لابس لبس البيت علشان يبقى ولد شاطر وجميل وبعد كده بقيت انا نفسى اخد بالى مقعدش فى البيت بلبس الخروج وخلصت المشكلة على كده كده انا فاهم صح يا باشمهندسة ؟؟ المشكلة انى حاسس او عندى ثقة ان التعامل مع تربية الولد بالنسبالى اسهل بكتير لكن تربيه البنات والتفاهم معاهم حاسس انه صعب جداً على اى اب فى رايك الى اى مدى ممكن الاب ينجح فى تربيه بناتة من منطلق التفاهم ونفس الكلام بالنسبة للام والاولاد الصبيان ؟

السلام عليكم ورحمة الله وبركاته

اعتذر على تأخرى فى الرد لان النت عندنا فيها مشكلة اليومين دول واضطر احيانا لغلق الاب توب شوية علشان عمرو وطارق يستمتعوا بسرعة اكبر على اجهزتهم
لانى طبعا لازم افهم احتياجهم الاكبر منى للنت هههههههه
ربنا يهدى الجميع يارب

اولا احييك جدا على طول بالك كده مع اسلام ربنا يبارك لك فيه وتشوفه احسن و انجح راجل فى الدنيا
فعلا انا شايفه تحليلك ده للبس الجينز اقرب للمنطقيه
وان كنت انا الآن الاحظ هذا مع عمرو ابنى بعد دخول الجامعه
فعلا الصبيان شخصيتهم متمردة جدا واكتر فى فترة المراهقة
عمرو بقه عاوز يفضل بعد رجوعه من الجامعه دايما بلبس الخروج علشان يكون مستعد للخروج لاصحابه فى الجامعة الجداد
ولا يتأخر فى اللبس ههههه وطبعا دى مشكلة
وانا بطبعى مش عاوزة اشتكى لوالده ذو الشخصية القوية جدا لتفادى التصادم بعمرو و خصوصا بعد عملية القلب المفتوح

لذلك اضطر لكظم غيظى كتيييير
ده حتى انا أدرس فى كليه الهندسة اللى فى نفس جامعة عمرو بس هو فى كلية علوم الكمبيوتر وبيقولى بلاش توصى عليه حد من زملائك الدكاترة ولا تجينى الكلية علشان لا يقولوا عليه زملائى مامته بتوصى عليه كأنه طفل ههههه وسمعت كلامه علشان ثقته بنفسه وشخصيته امام زملاؤه

بس لى نصيحة من أخت
صاحب اسلام جدا جدا من دلوقتى وخلى بينكم اسرار وقول له دى اسرار رجالة مش هنقول لماما ولا نورا وجودى عليها
ودائما خلى خيوط قوية بينكم للفضفضة
وفى نفس الوقت ما اسهل ان تتعامل مع البنات
هتلاقيهم اظرف واسهل بكتيييييير
والبنت دائما حبيبة ابوها
عارف يا بشمهندس احنا كنا 6 بنات وانا اكبر اخواتى
الله يرحمه بابا كان بيقولى دائما انتى ابنى الكبير و يعتمد عليه فى حل مشاكل باقى اخواتى
والحمد لله بعد وفاته حتى الآن لى كلمتى ووضعى مع اخواتى وازواجهم
لدرجة انى بحمد الله احل مشاكل اخواتى كلهم مع ازواجهم
وازواجهم يحترمونى جدا ويقولوا كأن الحاج لسة عايش
الحمد لله

اشكرك لثقتك واتمنى تفرح بأولادك يارب و يبارك لك فيهم