[محمود حسين المتحدة]

السلام عليكم ورحمة الله وبركاته
ياسر باشا وتسمحلى انى اخليها بدون القاب عشان بس اكدلك انى كلامى معاك خلاص بئة على مستوى الاصدقاء بجد .
المهم
بص يا جميل اللى حاجة اللى انا كنت عايز اكد عليها بس لانى فعلا معرفش اذا كانت معلومة وصلتلك بجد ولا كان فيها تقصير ولا حاجة فى الشرح
طبعا حضرتك انا لاحظت انه مكتوب فى الملاحظات بتاعة امر الشغل الخاص بيك وهى انه مكتوب السيارة بحاجة الى طلمبة مياة وهم طالما كتبوا كدة يبئة معناه انه لاحظوا انه الطلمبة فيها بوش او فى طريقها انها تبوظ والمفروض يكونا بلغوا حضرتك بده .. بس هو اللى انا خايف منه حاجة انه مايكونش حد وضح لحضرتك اهمية موضوع طلمبة المياة فى عربيتك بالتحديد ولا لآ ... وهو انه حضرتك كنت بتعمل صيانة الكاتينة وطلمبة المياة هنا داخلة فى دورة السير بتاع الكاتينة وده معناه انه لو طلمبة المياة حصل وانها باظت مش هتكون المشكلة انه الطلمبة فقط دى ممكن تعمل كمان مشكلة زى انه الكاتينة فيها مشكلة بالظبط وده معناه انها ممكن توصل – اقصد حالة انتهاء عمر طلمبة المياة - انه العربية يحصل فيها مشكلة زى لما الكاتينة يحصل انها بلية باظت او سير اتقطع يعنى العربية ممكن تدخل فى قصة صبابات ووش سلندر غير كمان انه ممكن بلية الكاتينة تبوظ وساعات السير كمان ..... والحقيقة الناس مش فاكرة اذا كان تم الشرح ليك بالتحديد فى نقطة زى كدة ولا لآ بس هو الطبيعى انه يكون حصل .. فانا بس حبيت اطمن انت عارف كدة ولا لآ ...
عموما هم احتمالين :
الاول : انك تكون عرفت القصة دى ولاى سبب مكانش فى امكانية لذلك بس فى الحالة دى لو انا مكانك كنت هاخد الكاتينة بسعر اللى هو بدون ضمان لانى عارف انه ممكن يحصل مشكلة تبوظ شغل الكاتينة ... بس هو عموما طلمبة المياة لما بتقرب تنتهى بجد عادة بتصدر صوت بيستمر شوية وبيكون طالع من الموتور عند ناحية الكاتينة مش فجأة يعنى عشان ما تقلقش من كلامى – صوتها طالع عندى بقاله اسبوع ومكسل اغيرها ( باب النجار ) - بس هو مش صح انى امشى كدة على طول لانها غالبا بحالتها دى مش هتكمل معاك ضمان تغير الكاتينة .
الثانى : انه حضرتك تكون معرفتش الجزئية بتاعة علاقة الكاتينة بطلمبة المياة وهنا يبئة الحمد لله انى كلمتك فيها عشان اوضحلك الاهمية دى .. بس كدة حضرتك ضرورى تشوف موضوع الطلمبة يعنى تشتريها وهى سعرها الطلمبة الاصلى بتاعة العربية عاملة 225 ج عندنا وللاسف خلصت حاليا بعد لما حضرتك كنت عندنا اقصد انه كانت متوفرة واكيد انشاء الله نجيبها تانى لو هتحتاجها اكد على . وكمان موجود نوع كوبى سعرها 175 ج هى كويسة كفينش لكنها بدون ضمان .. واما بالنسبة لتكلفة التركيب هى تقريبا نفس تكلفة تركيب الكاتينة 200 ج لاسبرانزا 113 يمكن اغلى حاجة بسيطة عشان بيضاف ليها مصنعية الطلمبة .... ودى بئة يا باشا انا هاعمل معاك واجب بجد حلو انا لو حضرتك هتجيبها اليومين دول هاخليهم يركبوها لحضرتك بدون اى تكلفة خالص باعتبار انك كنت لسة عندنا وبتعمل تقريبا نفس الشغل ... عشان بس تعرف انى جدع مع اصحابى .....
دى كانت ملحوظتى الوحيدة عشان اقول الموضوع ده خلص وانا مطمن انك خدت حقك بجد كشغل ونصيحة .
وطبعا انا مش زعلان من اى حاجة وكل اللى يهمنى اننا نقدر نكون سبب فى الخير لحضرتك وكل من يتعامل معنا