[محمود حسين المتحدة]

السلام عليكم ورحمة الله وبركاته
بناء على كلامى اللى قولته وزى ما وعدتكم بانى ارفع صورة امر الشغل واعلق على الموضوع واشرح للبشمهندس ياسر ليه هو دفع الفلوس دى وازاى انه لو له حق هياخده وبأكدها تانى يا بشمهندس ياسر .. انا ياباشا عند كلامى فى كل شىء وانا قد كلامى حضرتك انا راجل مسئول عن كل كلمة بكتبها والاكونت بتاعى هنا باسم المتحدة بشكل رسمى .. بس عايز استأذن حضرتك فى حاجة طبعا هيكون ليك حق الرد على كلامى وانا تحت امرك وصدقنى عمرى ما هانهى كلامى فى الموضوع ده معاك غير لما تقولى انا كدة معنديش مشكلة وتكون طالعة من قلبك بجد حتى لو هتوصل انى عشان اعرفك اد ايه احنا سمعتنا واسمنا يهمنا انى اعتبر كل اللى اتعمل فى عربيتك هدية منى انا شخصيا ليك وارد لحضرتك كل اللى انت دفعته حضرتك احنا ناس يهمها سمعتها . باختصار للنقطة دى بص يا جميل محدش يجى المتحدة ويمشى منها زعلان لآى سبب
المهم كنت عايز استأذنك فى عدم المقاطعة لانه زى ما قولت لحضرتك ولكل الناس انه الموضوع اللى حضرتك فاتحه كبيرواعتقد انى مش ببالغ فى ده . بس هو مش خناقة يعنى ولكنه محتاج شرح بالتفصيل ولو فضلنا كل لما اكتب حضرتك تعلق قبل لما اكمل كلامى تعلق- وبصراحة الطريقة مش مريحانى شوية - مش هنخلص واحتمال الموضوع يخرج عن قواعد واصول التعامل على المنتديات وانا بصراحة محبش كدة ولا هى تنفع تكون طريقة ناس متحضرين ومتعلمين زى حضرتك وانا وبالمناسبة انا حاصل على بكالريوس تجارة ادارة اعمال

اتمنى يكون طلبى مقبول ويكون لى الحق فى انى اخد فرصتى وهحاول اختصر الوقت بالكتير بكرة ياباشا هتكتب براحتك . زى ما هيكون ليك كل الحق فى التعليق على كلامى لما اقولك انى خلصت كلامى لان المقاطعة هتخرجنا من الموضوع وهاكون مضطر انى ارد على كل كلمة هتكتبها . وده غصب عنى بحكم شغلى مش دماغ صغيرة يعنى .... OK ؟

وعايز اطمنك مش هنقفل الموضوع غير وحضرتك راضى ومش بكلام دبلوماسى ولا حاجة . بس هو فعلا الموضوع محتاج توضيح شوية ورفع صورة على موقع واسكان . وبردوا هاكون راضى بحكمك فى الاخر بالنسبة للشغل بتاع عربيتك .

ارفع الصورة وارجع لحضرتك .. بعد اذنك

يتبع حالا ....