[AbOnOrA]

سؤال بحس ان فيه ناس بتتكسف تسأله او تجاهر برأيها فيه

هو ينفع واحد يبقى مسلم وعلمانى فى نفس الوقت !!
او مسلم واشتراكى او مسلم وليبرالى !!
هى مش الاشتراكية ديه كفر هى والعلمانية والليبرالية ؟؟
ازاى بقى تبقى عامل نفسك مسلم وانت علمانى وليبرالى وبتكره الدين !!

ده للاسف لسان حال فئه كبييييييرة من الناس دلوقتى حتى لو مصرحش بيه بيبقى ده اللى فى دماغة ..
وبيبرر ده لنفسه بحاجة من الاتنين على حسب
لو شايفك محترم وفاهم دينك تبقى عبيط ومضحوك عليك ومغرر بيك او حتى لابسك عفريت

او لو شايف شكلك مش عاجبة تبقى كذاب وبوشين وعامل فيها مسلم بس انت اصلاً ابن تيت ومش عايز تبين !!

وبالتالى هسأل تانى

ينفع تبقى مسلم بجد ومش كذاب ولا منافق وبتحب الدين ومؤمن بالحضارة الاسلامية وبتحب الشرع ومؤمن بالعقيدة ومش عبيط ومش ممول ومش لابسك عفريت ومش ابن تيت !!!!

انا مش هتعجل الاجابة ولا هصادر على فكرك بس عايزك تجاوب بصراحة ووضوح ايه رايك فى الناس اللى بيتقال عليهم علمانيين وليبراليين ؟
انت شايفهم مسلمين ولا اعداء دين ؟