[svneleven]

أنا كنت حضرت كورس مع الشركة بتاعتي اسمه بالعربي القيادة الامنة. بيقولك طبعا لازم حزام الأمان بلا نقاش. مسند الرأس في نفس مستوي الرأس و ليس أسفلها. يعني المسند من فوق يكون عند شعرك مش تحت عشان ديه بتكسر الرقبة في الحوادث الجامدة لا قدر الله. ما ينفعش الكرسي يكون بعيد قوي عن الزجاج الأمامي و لا قريب قوي. يكون في الوسط و طبعا حسب طولك بحيث انك تكون كاشف الطريق كويس و زاوية القدم مع الرجل مش صغيرة قوي و لا كبيرة قوي عشان ما تحسش بألم بعد شوية و بردو تكون القدم متحكمة في كل دواسة من أول مشوارها لأخرة. وضع الدركسيون لازم ما يلزقش في ركبك و كمان لازم يكشفلك كل عداداتك كويس. ارتفاع الكرسي يساعدك تكشف العدادات و تشوف وش عربيتك كويس و كمان تكون بعيد شوية عن سقف العربية عشان لا قدر الله في حالة انقلاب العربية الحزام اللي المفروض مربوط بيخليك تنزل شوية ناحية السقف فتكون مش محمل علي رقبتك. مسكة الدركسيون بقي مهمة لازم تمسك بأيديك الاتنين و الابهام اللي هو أول صباع ما يلفش حوالين الطارة لأن في حالة أن كاوتش انفجر لا قدر الله علي سرعة عالية هتلاقي العربية حدفت بسرعة جامدة و الدركسيون هيتحرك بقوة جامدة ناحية الحدفة و ده ممكن يكسر الابهام بسهولة. يعني من الاخر كل صوابعك تكون علي الطارة من فوق ما فيش واحد تحت الطارة. وضعية الايدين بقي يا اما في وضع الساعة 9:15 أو 10:10. يعني تخيل الساعة اللي بعقارب عاملة ازاي في أي وضع من اللي فاتو دول و حط ايديك الاتنين زيها. المرايات بقي الناس كلها عارفة حاول تكون 90 درجة مع الباب أو أضعف الايمان تجيب يا دوب جنب العربية. صدقوني الحاجات ديه كلها تعود مش أكتر. أنا من كنر ما اتعودت علي حزام الأمان باستعملة و أنا قاعد علي الكنبة الخلفية مع أي حد و كمان و الله و أنا ماشي علي رجلي بحس أني عايز أربط الحزام من كتر ما اتعودت عليه. ربنا يحفظنا احنا وولادنا و يهدينا.