رد: فكـــــــــرة مشـــــروع هايـــــلة...
بص يا باشا
اولا شكرا علي الموضوع ده اللي وراه معاني كتير و بيدل اد ايه انت انسان مثقف و محترم و من ناحية المبدا انا معاك و موافق علي الفكرة لكن ....
علي ارض الواقع الموضوع مختلف تماما. الشباب اللي انت بتكلم عليهم صدقني بقو عملة نادرة و نادرة جدا كمان. للاسف معظم الشاب في مصر(الاغلبية مش الكل) فكرتهم عن الشغل مشوهة و غريبة جدا. الكل عايز يبذل اقل مجهود و يجني اكبر عائد و انا لا انكر ان دي امنية اي حد في العالم بس بيتهيقلي الكل عارف ان ده شبة مستحيل خصوصا في الزمن اللي احنا عايشين فيه ده. عشان كدة الناس اللي فاهمة و اللي بتفكر بيحاربوا و يكافحوا و بيحفرا الارض باظافرهم عشان يجيبوا لقمة العيش و بيحاولوا بشتي الطرق يطورا من نفسهم عشان يقدروا يستمروا لكن الاغلبية العظمي من الشباب لما بيلاقي الموضوع فية تعب و جهد علطول يجيب ورا و يقولك انا ايه اللي يجبرني علي كدا و يروح يقعد في بيتهم او يتلقح علي القهوة او علي الناصية و يقعد يندب حظة و يشتم في الحكومة و البلد و الناس . و علي فكرة النظرة دي اتكونت عندي من خلال التجربة مش . احنا في مصر عندنا حتة ارض علي طريق الاسماعيلية و شركاء في شركة استثمار عقاري و بنحتاج عمال دايما و مش لاقيين و اللي بييجوا معظمهم مبيكملش اسبوع و بيزوغ خصوصا العمال اللي في الارض علما بان الاقامة و الاكل و الشرب علينا يعني مرتبهم مبينجرحش و برضة مش عاجب و عمال اليومية اللي في المنطقة شغلهم من 8 - 12 و طبعا خد منهم لكاعة و خناقات للصبح و يوم تحصلهم و 10 لا. ده طبعا غير ان والدي كل لما يلاقي شحات و يشوف انة ممكن يشتغل يعرض علية شغل و كلة بيرفض و في مرة واحد فية صحة ما شاء االه تهد حيطة و لما عرضنا علية شغل قالنا بالحرف يعني هتدوني كام ده انا في اليوم الواحد بلم فوق ال 800 جنية. شفت اعجب من كدة بيفضل الشحاتة و قلة القيمة عن ان يشتغل. ده طبعا غير الشباب اللي معاهم شهادات خصوصا الجامعية لكنه في الحقيقة لا يفقهون شيئا و ما اكثرهم و محتاجين تعليم من اول و جديد و ان كان الذنب الاكبر لا يقع عليهم لكنهم رضيو بكدة و استسلموا
طبعا انا عارف ان ده ميمنعش ان فية شباب كويس و مكافح و زي الفل بس قصاد كل شاب من دول في 10 من اياهم و اي حد هيفكر في الفكرة اللي انت طرحتها و قابلتة العينة دي هيكره نفسة و اليوم اللي فكر فية يعمل حاجة.
فزي ما انت قلت الموضوع حجمة اكبر بكتير من كدة و راي ان المشاريع الحقيقية لازم تكون موجهة لتغير طريقة تفكير و تربية و تعليم الناس عشان في الاخر نحصل علي شباب قادر و مؤهل علي الشغل و الانتاج و ساعتها الشغل هيجيلهم لغاية عندهم. لكن في ظل الظروف المحيطة بينا و الفوضي اللي حوالينا اي محاولة للاسف مصيرها الفشل. بس في الاخر الواحد يعمل اللي ربنا يقدره عليه و خلاص
معلش انا طولت في الكلام بس اتمني تكون وجهة نظري و صلت و نقدر نعمل حاجة بجد و تكون نتايجها مضمونة
__________________
Sharief Mansy
Farewell my Cayenne, you were the best car i ever had and driven
|