[salahabdelnabi]

المغامرة التانية

1


برومبو سافر هو وعايوشة فى رحلة بحرية لقبرص للاستجمام وتجديد شهر العسل

وعلى ضهر السفينة نفتاليك وقدام حمام السباحة بتاع السفينة برومبو ممد على كرسى زاى كراسى البحر ولابس مايوه بفتة

الوان الطيف ماركة " اوعى تغرقنى مابعرفش اعوم " عايوشة هى اللى مفصلاه فى البيت بمكنة الخياطة بتاعتها

وهى كمان ممدة على كرسى تانى جنبه ولابسة برنيطة مكسيكى على نضارة شمس ودريل احمر وبنطلون اصفر وبدى اخضر

برومبو : ايه رأيك يابت يا عشعش فى السفرية دى

عايوشة بدلع وتقل : والله حاجة اخر الاجة يا برومبتى

برومبو : عشان تعرفى بس انى مش حارمك من حاجة

عايوشة : بس يا خويا مش كنا طلعنا جمصة والا راس البر ووفرنا القرشينات اللى هايتفرتكو فى السفرية دى

برومبو : يابت هو انا دافع حاجه من جيبى ......... دى المكافأة اللى الريس اداهالى

عايوشة : برضه يا خويا كنت حوشتها كانت نفعت ........ ومالها يعنى جمصة ......... والله عليك تقاليع كده مالهاش عازة

برومبو : يابت خلاينا نقب شوية على وش الدنيا ......... بصى حواليكى وشوفى ومتعى عنيكى

عايوشة بغيظ : ينيلك هو انت مركبنى السخامة دى عشان تتفرج على النساوين البلابيص دول ....... وربنا افقعلك عنيك الاتنين

برومبو : نساوين ايه بس اللى هادفع فيهم كل الفلوس دى عشان ابص عليهم ..... ما الدش مليان وببلاش

عايوشة : كده برضه يابرومبتى ........ بتتفرج على نساوين غيرى وكمان من ورايا

برومبو : يا عشعوشتى انتى اللية والحتة الجوانية ......... نساوين ايه دى اللى ابصلها ........ دول حتة معصعصين ..... البلدى يوكل يا جميل

عايوشة : ايوة كده اتعدل احسنلك ........ بس ليه يا خويا البلد المقرفة اللى احنا رايحنها دى مافيش حاجة احسن من كده؟؟!!!

برومبو : مقرفة ؟؟!!! مقرفة ازاى يعنى ؟؟!!!

عايوشة : مش اسمها برص برضه ........ لازم تبقى مقرفة!!!!

برومبو : ياعشعوشتى اسمها قبرص مش برص ......... يابت اتنجرى بقه

وفى اللحظة دى الكل سمع صوت واحد بيصرخ بعلو صوته " غريق ......... غريق ........ حد يلحقنا يا عالم ....... غريق "


يتبع