المشاركة الأصلية كتبت بواسطة sarhanov
من زمان جدا وأنا بدخل المنتدى علشان استفيد منه بس عمرى ما شاركت فية بأى موضوع وكانت نيتى ان ربنا لما يكرمنى بشراء عربية جديدة ان اعمل موضوع عنها
فى الاول انا كان معاى تويوتا كورولا موديل 94 وكانت عربية فعلا حمالة اسية وحمار شغل ومكنة محترمة بس بصراحة موضوع ان يكون عندك عربية مستعملة وكل يومين عند ميكانيكى ولا كهربائى خلانى كفرت بالمستعمل ونويت لما ابعها مش هجيب غير جديد بمشيئة الله ومش هقرب من المستعمل وعلى رأى واحد عجوز وخبرة فى العربيات (( لو أنت غنى هات مستعمل ))
المهم ربنا أكرمنى وبعت التويوتا وبقالى شهرين بفكر فى شراء عربية جديدة
وبدأت رحلة البحث عن عربية جديدة فى حدود من 70000 ألأف الى 80000 ألف وطبعا المنتدى العظيم اللى احنا فية ده لفيتة جزء جزء من الانوس للفيرنا للساجا للوجان ثم الاستيب واى
بصراحة انا استقريت فى البداية على اللوجان ولما عرفت ان منها اتوماتيك اتعلقت بيها اكثر وقلت هى دى العربية المناسبة وبدأت اخد مشورة الناس اللى حولى وكلهم اعترضوا ويقولوا خليك فى اللا نوس او الفيرنا وريح دماغك من وجع القلب فى التدوير على قطع الغيار والميكانيكيا وحتى سعر اعادة البيع ممتازة
بس انا مكنتش مرتاح لا للفيرنا ولا اللانوس بحس ان هدفع فلوس فى حاجة متسويش المبلغ دة وعربيات مليانة عيوب ومش مريحة لمجرد توافر قطع الغيار واعادة البيع
بس اقتنعت بوجهة النظر اللى بتقول طالما هتشترى جديد يبقى قدامك 3 سنين فى الضمان وصيانتك هتبقى فى الوكاله واللوجان بدأت تنتشر وخلال 3 سنين قطع غيارها هتملى الدنيا ( على فكرة انا المنصورة )
واستقريت على اللوجان وقلت ان شاء الله على نص 11 هروح احجزها لما ادبر المبلغ وفجأة ظهرت قدامى الستيب واى
الستيب واى كانت بمثابة الصدمة لانها حلت مشكلة كبيرة كنت شيفها فى اللوجان وهى شكل اللوجان
شكل اللوجان مكنش مريحنى وشتان فى الشكل بينها وبين الستيب واى تحس ان الستيب واى جيب صغيرة وعالية عن الارض وعربيه مالية مركزها
بس رجعت خوفت علشان قطع الغيار بتاعتها وانها مش منتشرة واعادة البيع
ومن كتر التدوير عرفت ان قطع غيار الميكانيكا بتاعتها هى هى قطع غيار اللوجان بالظبط ولكن البودى والاكسسوارات طبعا مش بتاعة اللوجان وهنا جزء كبير من ترددى بدأ يتلاشى
بس بردة عدم انتشهارها كان مخوفنى وعرفت ان العربية لسة نازلة جديد يعنى اول 2012 مش ذى اللوجان من 2007 ومتوقع انها تنتشر جامد
بس الاهم من كدة ان اخوى قالى كلمة طالما هتشترى اركب اللى يعجبك واللى انت عايزة انت هتشترى عربية كم مرة فى العمر
واقتنعت بس عرفت بعد كدة ان الاوبشن اللى فيها اقل من اللوجان
الزجاج الخلفى مانيوال وكمان المرايات ومفيش كمبيوتر رحلات ومفيش منها اوتوماتيك بس فيها اللى مش موجود فى اى فئة سعرية ذيها وهى عوامل الامان الزيادة اللى فيها فرامل ال ABS وال AIR BAG ودة خلاها ترتفع للسما فى نظرى
مرايات كهربا وكبيوتر رحلات وزجاج خلفى كهربائى قدام عوامل الامان الجامدة دى - لا يبقى عوامل الامان هى اللى تكسب
نيجى لاخر نقطة اوتوماتيك ولا مانيوال - الناس المخضرمين بينصحوا متركبش اوتوماتيك أقل من 100000 الف جنية وياريت لو يابانى او المانى وفى شكاوى متفرقة من الأوتوماتيك بتاع اللوجان فبصراحة حبذت المانيوال
طب لو هجيب مانيوال لوجان ولا ستيب واى مانيول يبقى مع الشكل التحفة وعوامل الامان تبقى الستيب واى تكسب
المهم انا رحت شفتها فى تكويل رينو بالمنصورة وعجبتنى فعلا ونفسى اجيبها ومش عارف انا كدة تفكيرى صح
وعملت الموضوع دة علشان تشاركونى بأرائك قبل ما تخذ خطوة الشراء وتفكروا معى
وربنا يوفق الجميع |
تم انشاء صفحةRenault stepway lovers & owners على الفيس بوك للتواصل و تبادل الخبرات لكل ملاك و عشاق الساحرة (Renault step way)..... وعلشان كلنا اتحدنا فى الاختيار... اعتقد انه اكيد افكارنا هتكون متقاربة فى مجالات تانية كتير...وياريت كلنا نكون أدمن للصفحة دى....و الله الموفق((((((: