[AbOnOrA]

المشاركة الأصلية كتبت بواسطة ahmed_gman السلام عليكم ورحمة الله وبركاته جميعآ برجاء تقبلونى ضيف جديد الى الاخ مصراوى بارك الله فيك ونفعناالله بخبرتك فى مجال السيارات سؤال هل كل من يشترى سيارة جديدة ويحب يضبط اداؤها فى السير والجرى والثبات على الطريق شرط ان يقوم بتغير الجنوط الحديد بجنوط اسبور مقاس اكبر وكاوتش اعرض واوطى ولك جزيل الشكر

وعليكم السلام ورحمة الله وبركاتة

واهلا بيك يا استاذ احمد عضو واخ لينا فى اسرة مصر موتورز

حضرتك تعلم ان اى عربية لا سيما لو كانت عربية (عادية) للركوب (مش رياضية) بتتصمم بقدر المستطاع بموازنة بين اداء العربية وبين راحة الركاب وممكن كمان تكون الاولوية للراحة اكتر من التادية

علشان كده التركيز فى مجموعة التعليق (العفشة) والكاوتش بيبقى على الراحة اكتر لكن للحصول على اداء اعلى فى الثبات والمناورة لازم يتغير تصميم المكونات ديه للشكل الرياضى وده على حساب الراحة زى ما قولنا قبل كده

الكاوتش والجنوط من الاساسيات اللى تعديلها بيغير فى اداء العربية فى ( الثبات على السرعات - المناورة - الفرملة - التسارع) بشكل كبير وده نظرياً وعمليا (عن تجارب)

بس طبعا اختيار التصميم المناسب يحتاج لتحديد مستوى الاداء المطلوب اولا

لو حضرتك عايز اداء رياضى حقيقى والعربية قوتها تسمح بده يبقى لازم (تغير جنوط - كاوتش - عفشة) سبور مش بس الكاوتش او الجنوط

لو حضرتك عايز تعزز ثبات العربية على السرعات وفى المناورات ديه ابسط حاجات ممكن تتعمل
تهتم بحالة كل من المساعدين - السوست - الزوايا - الترصيص وحالة الكوتش عامة
مع تغيير كل من
الجنوط بجنوط سبور (انسب للكاوتش العريض)
كاوتش اعرض (فى المداس) ارفع (فى التخانة)

علما بان ده بياثر على مرونة العفشة وقد يساعد على اهلاك (بلى العجل) بمعدل اسرع من العادى
كمان ده بياثر على اداء العربية فى التسارع (السحب) و ان كان افضل فى الفرملة

اجمالا التعديل فى الكاوتش والجنوط لو اتحسب صح بيدى نتائج ممتازة فى الثبات بالمقارنة بتكاليفة وسهولة تنفيذة

اتمنى اننا نقدر نفيد حضرتك واهلا بيك مرة تانية