بسم الله الرحمن الرحيم
اخيرا ظبط العربية
هقول المشكله من البداية و هقول انا عملت ايه
المشكله كانت بتتلخص في اني لما كنت بدور العربية بتغيب علي ما تدور و بعدين لو دارت كانت بتبقي مخنوقه و سحبها ضعيف جدا و لما بغذيها بنزين بتتخنق و مش بترضي تدور تاني غير بعد فترة
الحل
انا قلت هفك الموتور يا نفع يا رميته و اشتريت واحد تاني بعد ما لقيت ان الميكانيكية بتيخضوا لما يسمعوا كلمة اوبل
المهم فكيت وش التقسيمة لقيت الدنيا شكلها حلو فكيت وش السلندر و لقيت الدنيا ضلمت فجأه لقيت الشنبر رايح خالص و البساتم تتهز بالايد كده عادي فيها خلوص كبير قوي و كمان لقيت الصبابات متعوجه و الكاوتش بتاعها متاكل و فيه صباب عامل دايرة ظريفة في راس بستم الكبيرة بقي لما فكيت كرتيرة الزيت علشان اطلع البساتم من تحت لقيت الزيت نصه بنزين !! يعني البنزين بيعدي من بين الشنابر و ينزل الكرتيرة
طبعا انا سيبت العربية يومين تلاته علي ما افوق من الصدمة و قلت ابدأ اشتغل فيها
نزلت اسكندرية اشتريت طقم جوانات و كانت الاسعار كالتالي للي عايز يشتري جوان وش السلندر 60 جوان كارتيرة الزيت 30 جوان وش التقسيمة 25 جوان مانيفولد 25 جوان فرن 30 بتاع الدايو اللانوس هوه بتاع الكورسا
و اشتريت طقم جلد صباب ب 60
و طقم صباب جديد اصلي 250 و طقم شنبر 180 هوه بتاع الاكسنت ال 1300 بيركب علي الكورسا 1200 الاستاندرد و زجاجة جملكة
و ركبتهم بايدي و الحمد لله العربية بقت بتدور من اول لمسه و هيه حاليا في التليين و الموتور بقي ناعم جدا و كل اصحابي و جيراني المحبطين للآمال مش مصدقين ان العربية دارت تاني
و انا طولت عليكوا بس حبيت اعرفكوا ان ممكن تتعمل عادي من غير ميكانيكي
و اي حد عغايز يسأل انا تحت امرة
م - سامح ليله