رد: جمال الستيب واى
هقولك رأي وبدون تحيز او عداوة مع العربية
انا أستلمت العربية من يومين وعامل بيها لحد دلوقتي 240 كم وانطباعي عنها كالاتي:
1- عربية عالية ومفيش مطب ولا بلاعة تقدر تخوفك حتي لو راكب فيها 4 غير السواق
2- واسعة من جوه جدا (الكنبة تشيل 3 من العيار الثقيل)
3- الشنطة بتاعتها معمولة عشان تشيل فيها بني ادمين لو حبيت
4- الاتزان بتاعها عالي جدا وانت اللي سايق العربية مش زي عربيات كتير بتكون هيا اللي سايقاك
5- الفوانيس الامامية تخلي الليل نهار أنا شخصيا لابس نضارة ومش محتاج غير نور الفوجات
6- عفشة ناعمة جدا جدا جدا
7- موتور مستعد يجري علي قد ما انت تقدر ومغري جدا للجري
8- فتيس ناعم
9- قعدتها عالية وتحس ان الكرسي حاضن اللي قاعد عليه
10- تابلوه شيك هوا اه مش فخم أوي ولكن شيك وكل حاجة فيه محطوطة في أنسب مكان ليها
11- فيها سماعتين قدام بمقام 4
12- البلوتوث حاجة أنا شخصيا مريحاني جدا وخصوصا في مكالمات الشغل اللي بتكون طويلة وانا سايق
14- العربية رغم حجمها اللي مش صغير عندها قدرة عالية جدا علي المناورة وسط سواقين الكارو (الميكروباصات) اللي في شوارعنا
مشكلتها معايا ان الزجاج الخلفي مانوال والمرايات كذلك وان مفيش وحدة رفع
من الاخر العربية مكسب للي أشتراها واللي ناوي يشتريها وانا أشك أن سعرها هيتخطي حاجز ال100 الف في وقت قصير جدا يمكن مع بداية السنة الجديدة
ملخص انطباعي عنها اليومين دول أن لما الفرنساوي يتكلم عربيات كتير لازم تسكت وده بعد تجارب مع الياباني والكوري و الايطالي وحتي الروسي مع كامل أحترامي
|