رد: مغامرات المفتش برومبو
25
قدام قهوة كتكوت عربية بأزاز فاميه وقفت والطريق قدامها مسدود بكراسى وترابيزات فوق بعضيها
ونزل منها السواق وسأل قصقوصة القهوجى " هى الحارة دى سد والا ايه "
قصقوصة : لا يابشا ........ دا احنا بس بنروق القهوة عشان العيد ........ هو سعادتك غريب عن هنا والا ايه ؟؟؟
السواق : اه ....... وكنت بدور على بيت المفتش برومبو
قصقوصة : هو البيت اللى ف وشك ده على طول ........ ايتها خدمة نقوم بيها
السواق : ابدا ......احنا كنا جايين عشان ناخد المدام بتاعته عشان هاتروح تزوره فى المستشفى
قصقوصة : مستشفى ايه كفى الله الشر؟؟!!! ......... هو برومبو باشا حصله حاجة
السواق وهو بيشاور للراجل اللى راكب جنبه : لا بسيطة بس المدام بتاعته ماتعرفشى الطريق واحنا جايين نوصلها على هناك
قصقوصة : يبقى لازم كلنا نيجى معاكو ........ آه اومال ايه ......... دا برومبو دا حبيبنا كلنا
الراجل التانى نزل من العربية وبيقول للسواق : خلصنا بقى اطلع هاتها عشان مانتأخرش على المستشفى ....... وانت يا جدع انت شيل الحاجات دى عشان نعرف نعدى
قصقوصة : حالا ياباشا كله هايبقى تمام ........... والحارة كلها هاتبقى جاهزة عشان تقوم بالواجب
وفى اللحظة دى نزل من الباب الورانى للعربية واحد شكله استغفر الله العظيم وحاطط بلاستر على دقنه ونضارة شمش سودة على عينه وبيزعق فى الراجل والسواق اللى معاه : ماتخلصو بقى ......انتو هاتحكو معاهم
وهو بيخلص كلامه لقى واحدة لابسة اسود ف اسود واقفة قدام باب بيت وبتشارولهم : انتو اللى جايين عشان تودونى لبرومبو المستشفى ؟؟!!!!
السواق : هو حضرتك مدام المفتش برومبو؟؟
عايوشة ووشها مكشر ونابينها باينين : ايوة انا يادلعدى ........انتو وقعتو والا الهوا اللى رماكو ......... يالا يارجالة شوفو شوغلكو
فجأة وبدون مقدمات رجالة الحارة كلهم طلعو من كل حتة وكل خن والحارة كلها ضلمت من الشوم والنبابيت والترابيزات والكراسى اللى اترفعت فى وش التلت رجالة
وفين يوجعك والتلاتة خدو علقة مايخدهاش حرامى فى مولد والعربية بقت كومة صفيح مالهاش ملامح اكن وقع عليها جبل والتلاتة وقعو سايحين فى دمهم وأغمى عليهم
عايوشة وهى بترن ضحكة بدلاية : اسم النبى حارسكم وصيانكم ....... رجالة من ضهر رجالة ........ فوقولى الكبير بتاعهم عشان اتكلم معاه شوية
قصقوصة جرى جاب جردل مية وسخة من تحت النصبة بتاعة القهوة وطسها ف وش الراجل الكبير بتاعهم اللى شهق واتفزع وفط ونط وقعد على حيله ف الارض والمية مغرقاه من ساسه لراسه
عايوشة : كنتو فاكرين انكو هاتضحكو على عايوشة ........ يا خى فشر .......... دا انا مرات برومبو على سن ورمح
فى اللحظة دى برومبو والشباب كلهم وصلو الحارة وجرى برومبو على عايوشة بلهفة " انتى بخير ياعشعش ؟؟؟؟
كنت خايف لا ولاد الكلب دول يعملو فيكى حاجة .......انتى عارفة دا مين ........ دا كوهين الكهين .....السفير الاسرائيلى بنفسه "
يتبع
__________________
عجبي علي العجب العجيب العجاب
لما الحقيقة تطل بعد احتجاب
و تروح و تحلا وفجأة تصبح مفيش
كمثل طراطيش بحر ياما خد و جاب
عجبى !!( صلاح جاهين )
التعديل الأخير تم بواسطة salahabdelnabi ; 26-09-2009 الساعة 06:45 PM
|