[borio1704]

المشاركة الأصلية كتبت بواسطة M.TONSY تسلم ايدك موضوع فعلا مميز واكثر من رائع وايه راى حضرتك فى زيت فيسكو 5000 الاماراتى ده زيت advanced synthetic ولزوجته 5W/40 انا جايبه علشان الشتا وكنت بحط زيت فيسكو 2000 وده زيت معدنى ولزوجته 20W/50 وكان شغال كويس جدا معايا فى الصيف بس حبيت اجيب حاجة اخف علشان الشتا فهل التغيير من معدنى لتخليقى عادى لايستدعى اى اجراء او اضافة للموتور قبل التغيير وهل النوع التخليقى اللى جبته ده مناسب لعربية فيرنا 2011

أشكرك على اهتمامك وأحمد ربنا إني قدرت أوصل المعلومات بشكل كويس

وعايز أشكرك أكتر لأني استفدت من سؤالك جدا...
وبصراحة ... الأسئلة هي اللي بتخلي الواحد يدور ويعرف أكتر



طيب ندخل في الموضوع

موضوع التحويل من زيت معدني إلى تخليقي طالع عليه كلام كتير أنه مش كويس وبالذات لو الموتور كان قديم

طيب ليه كده؟؟؟؟


عشان نجاوب لازم ندخل في شوية تفاصيل علمية


بالنسبة للزيوت المعدنية.... فهي مافيهاش مشاكل بشكل عام لما نحط عليها إضافات لتحسين الخواص بتاعتها.



إنما الزيوت التخليقية الزيت الأساسي فيها بيتسمى (بولي ألفا أولفين polyalphaolefin) أو POA، وطبيعة الزيت ده إن الإضافات مش بتدوب فيه ! ! !

وعلشان الإضافات تدوب .. فيه مادة تانية وسيطة (مذيب) بتتزود ... الإضافات تدوب فيها وهي كمان تدوب في زيت الـPOA.

المادة دي بتبقى معمولة من أحد مركبات الـ(إستر ester).


طيب إيه المشكلة؟؟؟


المشكلة الأساسية إن الإسترات مواد مذيبة ... ولما الزيت يشتغل في الموتور تبدأ هي تدوب الرواسب والمواد الملتصقة من الزيوت المحروقة وخلافه، وتفضل موجودة جوه الزيت، وفيه احتمال كبير إنها تسد الفلتر


المشكلة التانية اللي ممكن تحصل... الإسترات ممكن تأثر على الجوانات والأويلسيلات الموجودة في الموتور، وده معناه تسريب وفقد الزيت

بس ده كان واضح بشكل كبير في الزيوت التخليقية القديمة (أول زيوت تخليقية ظهرت في السبعينات)

حاليا.... الزيوت اتطورت، ومبقاش فيها التأثير المدمر ده.... إلا إذا كانت الجوانات والأويلسيلات أصلا تعبانة ومشرخة ... فالزيت هيظهر الشروخ والشقوق ويخليها تظهر بوضوح



طيب إيه الاحتياطات اللي لازم نعملها علشان ما يحصلش معانا مشاكل؟؟؟


أولا: لو الموتور قديم

يعني بقاله كام سنة شغال على الزيت المعدني بس... والخطوات دي هتتعمل قبل أول مرة هتحط فيها زيت تخليقي:

1- لازم نغير الجوانات والأويلسيلات بتاعة الموتور لإنها حتضرب بعد التشغيل بمدة قصيرة، بالذات لو الموتور بقاله أكتر من 5 سنين

2- يفضل يتعمل أويل فلش Oil Flush قبل ما نحط الزيت التخليقي عشان نشيل الرواسب القديمة

3- لازم نغير الفلتر، ونلاحظ ضغط الزيت وصوت طلمبة الزيت بعد التشغيل مباشرة

ثانيا: لو الموتور جديد

يعني الموتور لسه ما كونش ترسبات كتير والجوانات والأويلسيلات لسه جديدة

* مفيش مشاكل إن شاء الله... هتغير الفلتر وتلاحظ التشغيل وبس

طيب ... إفرض إني حبيت أرجع للزيت المعدني تاني... فيه مشاكل؟؟؟؟؟

أبدا.. بدل وغير زي ما انت عايز .... المهم يبقى موتورك أصلا حالته كويسه




...