ألف شكر يا أستاذ أشرف على الموضوع الشامل و أنا رحت سيوة بعد العيد الصغير السنة دي يوم 22/8/2012 وكان الهدف العلاج لأني كنت قريت مقال عن فوائد رمال سيوة في علاج المصابين بجلطات المخ و رحت عند المردم شريف السنوسي و هو راجل محترم جداً و من شيوخ العلاج بالردم والتي ورثها أباً عن جد و إن كنت لم أستطع تحمل إجراءات الردم و خصوصاً الخيمة
نظراً لحالتي الصحية و قعدت هناك يومين فقط منهم يوم في فندق الكيلاني و هو زي ما حضرتك قلت متوسط المستوى:w6w20050411134026 6d. والغرفة كلفت 100 جنيه في اليوم (2 سرير + حمام متواضع + تكييف شباك شغال +ثلاجة+ تليفزيون).ولكن ميزته الرهيبة إنه في قلب ميدان السوق تنزل تلف كل حاجة جنبك( الجامع الكبير - مدينة شالي-المطاعم - المحال الأثرية ...)
للأسف الشديد
وسيلة المواصلات المباشرة الوحيدة إلى سيوة هي أتوبيسات غرب الدلتا و التي تعتبر في حد ذاتها إهانة لأهالي سيوة الرائعين فالأتوبيسات متهالكة و التكييف زبالة و صوته مزعج جداً و الكراسي مبهدلة و مقطعة و المسافة بين المقاعد ضيقة جداً فهي نفس أتوبيسات الـCTA عندنا في القاهرة (المكيف يعني) وهي لا تصلح للسفر بين المدن إطلاقاً ولذلك أنصح أي مسافر لسيوة أن يعمل حسابه و يحجز عدد 2 كرسي لكل فرد (سعر التذكرة 75 جنيه للكرسي) حيث أن السفر لمدة تفوق الـ 10 ساعات تسبب في تورم رجلي الإثنين
و إضطريت ألبس شبشب بدل الكوتشي أو يركب الإتحاد العربي (السوبر جيت) لحد مرسى مطروح و ياخد غرب الدلتا من مطروح لسيوة بس دي عايزة تظبيط للمواعيد
طبعاً بدون كلام سيوة روعة كفاية إنك في وسط النهار و لا تحس بحرارة شديدة ((الجو محتمل جداً) )عشان ما فيش رطوبة و السماء زرقاء بطريقة مش طبيعية و ما فيش ملوثات و لا عادم و لا ذباب و لما تاخد نفس تحس إن صدرك حجمه بيزيد كده بطريقة مش متعودين عليها في القاهرة (الهوا نضيف يا جدعان) و بتحس أول ما تنزل من الأتوبيس إنك دايخ لأن الهدوء غير طبيعي
سيوة كنز قومي مصري و إنشاء الله أكرر التجربة لما أتحسن شوية تقبل تحياتي
:GROWIN~ 12:
:GR OWIN~12: