[auto5truck]

أستاذى العزيز

طبعا ً ما سوف أورده هنا هو رأيى الشخصى و هو غير ملزم, حتى لو كان يناقض أراء بعض الزملاء من السادة الأعضاء فالرجاء تقبله.
المقارنة بين السيارتين لانوس و نيو أكسنت مقارنة ظالمة لأنه شتان الفارق بينهما و حتى على أبسط الأمور فى السعر لكن لو سيادتك تقدر تدفع المبلغ ده فطبعاً السيارة الأحدث أفضل.
المقارنة بن نيو أكسنت زيرو و نيسان صنى مستعملة أيضاً ظالم فالسيارة المستعمله أذا كانت بنفس سعر سيارة زيرو حتى لو كانت حالتها جيدة فالزيرو يكسب لأنك بتدفع تمن العربية ثم بتصرف عليها صيانتها الدورية و بعد كام سنة تبدأ تصلح فى العربية يعنى موفرة لكن العربية المستعملة بتدفع تمن العربية + تمن الأستهلاك الذى أستهلكة مالك السيارة الأول منها.
أحد أصدقائى فى عام 2003 أشترى سيارة BMW 520 كانت تحفة موديل 2000 عاملة 64000 كم كان دافع فيها فى الوقت دة 154000 جنية و معاها قدم له المالك الأول دفتر الضمان و الصيانة مختوم من أبو الفتوح لكل صيانات السيارة و كل الأصدقاء بهروا بيها و عن نفسى أنا قلت له لما أنت كنت قادر تدفع المبلغ ده ما أشترتش لية عربية تيوتا جديده رد و قالى يابنى دى BM فاهم يعنى أية BM و بعد تقريباً شهر و نصف من شراء السيارة و نقل الملكية.....فوجئ بلمبة الزيت نورت فبطل الموتور و وداها التوكيل اللى قالولة أن الموتور دة ما أتغيرلوش زيت و لا مرة و أنه حصلت فية تلفيات لازم يتفك و التكلفة كانت 36000 جنية.
طبعاً الحكاية دى مش بالضرورة تكرارها لكن هى مثال على أنك طالما معاك تمن عربية زيرو حتى لو كانت عادية جداً فهى أفضل 100 مرة من سيارة مستعملة و لو كانت (تحفه).

مع تحياتى