رد: مغامرات المفتش برومبو
22
فى مكتب عبقرينو والكل طاير من الفرحة وابو نورا ماسك اللاسلكى بيكلم دورية الشرطة : اتحرك ياسيادة النقيب ....... الهدف فى الطريق .......... وزاى مافهمتك
فى نفس اللحظة برومبو بيكلم د / بولبولان فى الموبايل : تمام يافندم بوند والشباب ومعاهم ليفة فى الطريق للكيلو 70
عبقرينو بيكلم زومة برضه على الموبايل : عملوها الوحوش ..... وكلنا جايين على عندك
التلاتة خلصو مكالمتهم وبصو لبعض وهاتك يا احضان وابو نورا بلهفة جامدة : الجزء الاخطر والاصعب عدى من المهمة مش عايزين نفرح اوى الا لما تكمل على خير
برومبو : ان شاء الله هاتكمل على خير ......... ويبقى درس العمر بالنسبالهم
عبقرينو : والله يابرومبو انت طلعت دماغ جامدة اوى المرة دة ........ يخرب بيت شيطانك
ابو نورا : اومال .............هما فاكرين ايه .......... دا احنا برضه المصريين يا جدع
************************* ***********
" اقرا الخبر ............. فضيحة الملحق العسكرى الاسرائيلى ........ اقرا الخبر "
بتاع الجرايد بينادى على جرنان الاهرام المسائى ويزعق بعلو صوته بشماتة وتريقة وفيها خبر فضيحة الملحق العسكرى الاسرائيلى
اللى ظبطوه فى عربية مع موزة وفى اوضاع مثيرة جدا على الطريق الصحراوى بالصور والناس بتخطف من ايديه الجرايد
وف مكتب وزير الداخلية ومعاه مدير المخابرات ومدير الامن ود / بولبولان والكل بيتابع القنوات الفضائية والمحلية
والخبر نازل فى شريط الاخبار الاحمر عن ظبط الملحق العسكرى على الطريق الصحراوى
وزير الداخلية : ضربة معلم يابرومبو ......... تسلم دماغك وتسلمو يارجالة يخطفوه من السفارة نفسها ؟؟؟ !!!!
ويطلعو بيه على الصحراوى ويظبطو عربية وتكون فى مزّة معاه فيه
وطقم الحراسة اللى معاه يقول فى التحقيقات انه خرج من الهرم وحب يتمشى لوحده فى شارع الهرم
ومفعول الدوا بتاع عبقرينو يخليه يقول فى التحقيقات الكلام ده ....... لا وايه كمان
وانه اتعرف على واحدة وكان طالع بيها على شقة مفروشة فى اسكندرية يظبط معاها
وان العربية عطلت فى السكة فا قضاها فى العربية
ودورية الشرطة تعمل كردون حوالين العربية عشان ماحدش يتدّخل ويبوظ التخطيط كله
والصحفين يصورو الفضيحة وينشروها فى الجرايد والمراسلين الصحفيين للقنوات الفضائية والارضية يصورها فيديو وهايذيعوها كمان شوية
د / بولبولان : فعلا دماغ بنت حرام ......... وسيناريو شياطينى من الاخر ..... يورونا بقى هايخرجو من المطب ده ازاى
مدير المخابرات : بس فيه نقطة خايف تكون فاتت عليه
مدير الامن : نقطة ايه يا معالى الوزير
مدير المخابرات : رد فعل الاسرائيلين ولاد الكلب دول ........ وده اللى الخبير المماثل عندنا فى الجهاز درسه
وزير الداخلية : خبير مماثل ؟؟؟!!!! يعنى ايه
مدير المخابرات : يعنى خبير مختص بطريقة تفكير العدو فى كل ظروفه واوضاعه وبيستنتج الخطوات اللى ممكن يعملوها لو اتحطو فى اى موقف
د / بولبولان : وكان رأيه ايه الخبير فى اللى حصل .........وايه اللى توقعه انهم ممكن يعملوه
مدير المخابرات : رد فعل عنيف ردا على العملية دى وخصوصا ان احنا حاطناهم فى مزنق مش هايعرفو يطلعو منه
وزير الداخلية : تقصد عملية ارهابية مثلا
مدير الامن : دى تبقى مفضوحة اوى لو عملو كده لان ساعتها الكل هايتهمهم فيها .........
وخصوصا ان الخبر اتنشر فى الاهرام المسائى و هاينزل فى الطبعة الاولى بالليل فى الجرايد القومية الاهرام والاخبار
وكمان اتذاع على كل القنوات الارضية والفضائية خبر الفضيحة وتنويه على سرد الخبر بالكامل بالفيديو
وزير الداخلية : يبقى لازم نأمن كل المناطق الحيوية ونكثف الحراسة عليها ونشدد فى اجراءات الامن شويتين
مدير المخابرات : لا طبعا هما صحيح عبط بس مش للدرجة دى
د / بولبولان : فهمت اللى معاليك تقصده ........ الرد مش هايكون على المستوى العام
مدير الامن : تقصد انهم هايحاولو ينتقمو من اللى عمل العملية دى
وزير الداخلية : بس انت قولت يا دكتور انهم ماشفوش اللى خطف ليفة من السفارة وانهم كانو متنكرين فى وش موشى ابن عمه وكمان مجانص كان مغير ملامحه
د / بولبولان : لكن فيه اتنين وشهم معروف لكوهين
وزير الداخلية : قصدك يعنى ............ ابو نورا وبرومبو
مدير المخابرات : بالظبط كده وهو اكيد هايستنتج ان اللى ورا العملية دى الاتنين دول
د / بولبولان : ممكن طبعا لكن ماعتقدش انهم يقدرو يعملو حاجة لابوا نورا لانه ظابط فى الداخلية واكيد مش هايفكرو يواجهو الداخلية او فرد منها عشان الانتقام
وزير الداخلية : انت كده تقصد .......
د / بولبولان : بالظبط مافيش غيره .......... برومبو هو المقصود بالعملية الانتقامية دى
يتبع
__________________
عجبي علي العجب العجيب العجاب
لما الحقيقة تطل بعد احتجاب
و تروح و تحلا وفجأة تصبح مفيش
كمثل طراطيش بحر ياما خد و جاب
عجبى !!( صلاح جاهين )
التعديل الأخير تم بواسطة salahabdelnabi ; 23-09-2009 الساعة 04:54 PM
|