[Mido Madrid]

المشاركة الأصلية كتبت بواسطة borio1704 معظم مواتير العربيات اللي بنركبها حاليا (بنسبة 99.9%) بتشتغل بطريقة إسمها "دورة أوتّو" (عشان مخترع الطريقة دي كان واحد ألماني إسمه Nicolaus Otto).. الطريقة دي مشهورة بإسم تاني اللي هو: "الدورة رباعية الأشواط"... باختصار الدورة دي معناها إن من ساعة ما خليط الوقود والهواء ما يدخل لحد ما يخرج في صورة عادم لازم تعدي 4 أشواط عشان الاحتراق يتم. أشواط الدورة دي كل واحد فيها بيعمل حاجة والأشواط دي هي: 1- السحب (Intake) وفيه المكبس (البستم) بيتحرك لتحت في أثناء فتح صمام السحب... فيسحب خليط الهواء والوقود جوه السلندر 2- الضغط (Compression) وفيه صمام السحب بيقفل... والمكبس بيتحرك لفوق ... فيضغط خليط الهواء والوقود لحوالي 1/10 من الحجم الأصلي (ودي اللي بيتقال عليها نسبة الصغط 1:10) 3- الإشتعال أو انطلاق الطاقة (Power) وهنا بيحصل اشتعال الوقود المضغوط عن طريق شعلة البوجيه ويحصل انفجار يخلي المكبس يبعد بسرعة عالية (بنفس فكرة الرصاصة في البندقية) 4- العادم (Exhaust) هما صمام العادم بيفتح... والمكبس يطلع لفوق ويطرد العادم بره السلندر عشان نبدأ دورة جديدة بص على الصورة دي كده طبعا... في الشوطين بتوع الضغط وانطلاق الطاقة... أهم حاجة إن ما يحصلش تسريب للهواء المضوط جوه علشان ناخد أكبر استفادة من الاحتراق اللي حصل وزي ما قالك الزملا... فيه كذا مصدر لتهريب الضغط 1- الصمامات (Valves) ودي ممكن ما تبقاش قافلة كويس مع وجود رواسب ما بين الصمام ووش السلندر (في المكان اللي بيبات فيه) أو ممكن يكون فيه تآكل بشكل أو بآخر ما بينهم. 2- الشنابر أو حلقات المكبس (Piston Rings) ودي بتتآكل مع الوقت ، أو ممكن تتكسر مع كتر عمل الموتور على دورات منخفضة 3-الشميز أو جدران السلندر (Cylinder) وده بيحصلو تآكل مع الوقت برضو 4- وش السلندر ممكن وش السلندر ما يبقاش قافل بإحكام نتيجة رباط ضعيف أو تقفيعة قديمة أو جوان غير سليم 5- وجود شرخ في أي أجزاء داخل السلندر زي الشميز أو البستم أو وش السلندر آخر حاجة... مواتير الديزل بتشتغل بنفس الطريقة... بس الفرق إنها مافيهاش بوجيهات والاشتعال بيتم تلقائي عشان نسب الضغط ما بتقلش عن 20 ...

شكر اعلى الشرح الوافي