رد: حلقات (جريمة كل يوم) ألغاز بوليسيه مسلسلة
الحلقة 25
////////////
دخل شمندى على النقيب جوهر صارخا:
-ألحقنى يا سعادة البيه أنا أتسرقت
بيتى اتخرب
قال النقيب:
-أنت مين الاول؟
-أنا شمندى سعادتك بواب عمارة
-أيه اللى حصل يا عم شمندى
-أنا سعادتك كنت قاعد فى أودتى فى أمان الله ومعايا تحويشة العمر جبتها من البنك عشان أشترى حته أرض للولاد ف البلد النهاردة00
فوجئت أنها أتسرقت
-والفلوس دى جبتها من البنك أمتى؟
-أمبارح سعادتك00ستين ألف جنية ينطح جنية
-ومين كان يعرف أنك سحبت فلوس من البنك وحاططها عندك ف أودتك
-هما تلاته يا بيه والتلاته زارونى ليلة أمبارح بليل
-حلو جدا مين هما بقى التلاته؟
-زغلول بواب العمارة اللى جنبى
وعزت القهوجى
وشاكر المنادى
-التلاته متعود تستقبلهم فى أودتك
-أيوة يا بيه دول صحابى!
-ومش غريبة أنك تسيب التلاته فى الاودة وف نفس الليلة وكل واحد منهم يجيلك لوحده
-ده اللى حصل
زغلول سبته بتاع ربع ساعة كنت بجيب شاى عشان لما رحت أعمل له شاى ملقيتش
وعزت كان فيه واحد من السكان خبط عليا وطلب منى أركن له عربيته وغبت بتاع خمس دقايق
و شاكر المنادى بتاع الشارع جالى بعدها وسبته حوالى خمس دقايق او أكتر شويه كنت ف الحمام
وباستدعاء الثلاثة
قال زغلول:
-انا فعلا زرته أمبارح وقالى أنه مسافر البلد يشترى حته أرض ومجهز فلوسها لكن أنا عمرى ما أسرق وأخون الامانه ومع مين مع صاحبى!
-رحت له ليه؟
-هوه اللى بعتلى يابيه
وسألنى عن عمارة فاضية يشغل فيها ابنه
-بس مبلغ خمسين ألف يطمع أى حد
-خمسين ألف؟
ده قالى عشرين بس!
وقال عزت:
-أنا آه أعرف ان فيه فلوس معاه لكن أسرق لا يابيه
-خمسين ألف دول مش شوية
-ولو مليون جنية يابيه ربنا يكفينا شر الحرام
-أتكلمتوا ف أيه؟
-قالى أنه عايز يشترى حته أرض وعايز يجيب ولاده التلاته يشوف لهم شغل لان الزراعة معدشى بتجيب همها
ورحت له ليه:
-أنا تقريبا متعود أعدى عليه كل يوم عشان بينا حساب سمسره سعادتك
وقال شاكر:
-أنا مسرقش أبدا سعادتك
-يعنى متعرفش أنه كان معاه ميت ألف جنية
-ميت ألف 00الواحد برضة كان ممكن يفكر فى مبلغ زى ده00المعفن مكنش بيعمل لنا كوباية شاى ومعاه ميت ألف 00حكمتك يارب!!
-ورحت له ليه ليلتها؟
-متعود أعدى عليه كل ليلة لما أخلص شغل سعادتك
وبعدها أعتصر النقيب جوهر رأسه للوصول الى الجانى وبعدها عرض الاقوال على العقيد فضة والذى ابتسم بعدها وأيّد حل اللغز الذى توصل اليه
النقيب جوهر
الى اللقاء فى الحلقة القادمة
__________________
|