فيدونى اعمل اييه فى الكارثة اللى انا فيها دى
القيها عربية فيات 131
طالع عين ابوها
جربت اسوقها .. ايه ده ؟!!!
اولا : الدركسيون تقيييييييييل بطريقة مش طبيعية
ثانيا : عربية بتحدف منى يمين و شمال مع نفسها
ثالثا : مافيهاش ولا تكييف ولا باور
رابعا : لما بكون على التانى و عايزة انقل على التالت مبيجيييش غير بخناق لدرجة انى بحس ان الفتيس هطلع فى ايدى
خامسا : صوت الماتور عالى اوووووى .. و كأنى سايقة جرار
سادسا : لما بدور العربية لازم اكارك (ادوس على البنزين كذا مرة ) علشان تدوور
سابعا : ركنة العربية .. ايه جدعان ده :O حاسة انى بركن مقطورة
من الاخر مش عارفة اتعامل معاها نهائى و بابا بيقولى انتى كدا مش بتعرفى تسوقى
فى انا بفكر اجيب لانسر مو 2008 هى معروضة عليا دلوقتى ب 80000 جنيه
اتوماتيك و باور و زى الفل و امشى بيها و اتعلم عليها
لكن بابا بيقولى كل اللى بيبتدى يسوق لازم يبتدى على عربية قديمة عشان مهما خبط فيها فهى بملاليم لكن فى جديد بتكلف
و فى مشكلة اكبر هى انى مشاويرى كلها مش داخل المدينة كل مشى على محور و دائرى عشان الجامعة ازاى بقى اروح ب 131 على المحور ؟!! طب لو عطلت منى اعمل ايه
حد يفهمنى اعمل ايه عشان اتعلم اسوق وسط الزحمة عشان بجد تعبت و جالى عقد من السواقة
سورى انى طولت شوية بس من همى بفضفض