بسم الله الرحمن الرحيم
بعد حيرة كبيرة و سهر و قرف و تفكير مهلك ربنا هداني للـ M11 2013 ، و كنت بقارن بينها و بين أفيو Automatic 2013 ، بس لقيت الناس كلها بتلعن فيها و في مشاكلها و عيوبها
و بعدين مفيهاش اي حاجة تخليها عربية تستاهل 87,000 جنيه بصراحة خالص يعني دي حتي مفيهاش ريموت سنتولوك!
عكس M11 من أول سنة نزلت فيها و عاجبني شكلها جداً و كمان ما شاء الله تقيلة و شديدة و موتور و ثبات و ABS, EBD و ناس كتير راكبينها و معظمهم بيشكر فيها و هبقي وفرت 16 الف جنيه كمان !
بس الحقيقة إني برضه متردد شوية و محتاج آرائكم السديدة إن شاء الله خصوصاً الناس اللي معاهم M11 ، إيه رآيكم في العربية و إيه مشاكلها بصدق و أمانة شديدة ينوبكم فيا ثواب ؟؟ و هل أتوكل علي الله و أشتريها ولا بلاش ؟
انا عن نفسي زي ما ذكرت قبل كده طالب جامعي و بطولي و لسه قدامي 5 ، 6 سنين لوحدي و علي قد مشاوير داخلية جوة البلد بس و بطلع علي الطريق نادر جداً ، و حنين علي العربية في السواقة و إن شاء الله ههتم بيها .. تفتكروا ممكن تشيلني 5 ، 6 سنين ؟
انا اسف علي الإطالة بس دي أول عربية أجيبها شخصية و فعلاً موضوع محير جداً اتمني تساعدوني بأه أو لأ و ربنا يكرمكم
بس رجاء خاص محدش يعرض عليا أسامي عربيات انواع تانية لأني هرست كله و شفته و كله مش عاجبني ، و بداية النضيف بالنسبالي فوق 110,000 و ظروفي حالياً متسمحش ..
مرة تانية آسف علي الإطالة و منتظر ردودكم الكريمة
تحياتي لكل الإسبرنزاوية
