السلام عليكم جميعا
انا يا جماعة واقع فى حيرة شديدة ومفيش غيركم بعد ربنا سبحانه وتعالى عشان تيفودونى ان شاء الله
انا حاليا وبعد بحث أستمر لفترة طويلة جدا عشان اشترى عربية فى حدود 115 ألف ما بين عربيتين مش لاقى أفضل منهم أو ما ينافسهم
1-لانسر بومة 1600 GLX (Automatic Full option ودى سعرها 112 ألف
2-كيا نيو سيراتوا SX ودى ب 116 الف
طبعا الأولى (اللانسر) غنية عن التعريف واللى مخلينى بفكر فيها بشدة وضعها المستقر فى السوق الللى بيدل على اعتمادية عالية بجانب انها يابانى وبكدة تكون مميزتها كالتالى
1-بلد المنشأ افضل (يابانى)
2-وضع فى السوق أفضل (سعر اعادة البيع)
3-قطع غيار متوفرة وبسعر جيد
ولكن من الجهة الاخرى هنلاقى العيوب
1-العربية موديل قديم ومنتشر جدا جدا جدا
2-تكنولوجيا قدمت نسبيا
3-كماليات أقل
التانية (السيراتو) عربية منطلقة بسرعة الصاروخ وبتثبت نفسها يوم بعد يوم بتكنولوجيا وتصميم على أعلى مستوى وبكدة تكون مميزتها
1-تصميم وشكل على أعلى مستوى
2-تكولوجيا متطورة
3-كماليات رائعة(17 جنوط سبور-تكييف تتش-ESC electronic stability control-information system-Rear parking system-كاسيت هايل-auto light control system-بجانب مزايا تانية كتير)
من الناحية التانية العيوب:
1-بلد منشأ اقل نسبيا (كوري)
2-عربية جديدة محدش لسة عارف عيوبها
3-سعر اعادة بيع غير معلوم مستوها لان وضعا فى السوق لسة مظهرش بصورة كافية
واخر حاجة ان استلامها حاليا بياخد فترة مش قليلة(حجز واستلام فى خلال 4 شهور!!)
مقارنة محيرة ومحتاج مساعدتكم ورأيكم العلمى (وياريت نركز على النقاط التقنية لانى مهندس ودى حاجة ببصلها بعين الاعتبار جيدا)
وان شاء الله يكون أحلى عيد عليكوا جميعا
اخوكوا تامر المصرى