[salahabdelnabi]

18


فى مكتب عبقرينو ....... ابو نورا رايح جاى بقلق وتوتر وعمال يحرق فى سجاير وبص لبرومبو وقاله " كده هما اتأخرو ........ تفتكر ايه اللى حصل "

عبقرينو : انا خلصت المطلوب منى من بدرى ....و مستنيهم يوصلو .... هما فعلا اتأخرو اوى

برومبو : ماتواتواروناش ياناس ....... اهدو شوية .... المفروض انهم لما يطلعو من السفارة وياخدو الطريق الصحراوى هايكلمونا

واكيد شوية مشاكل بسيطة بس بوند ومجانص ادها وادود

ابو نورا : طب ليه ماخلتنيش اروح معاهم

برومبو : لان وشك اتعرف من الزيارة اللى عملناها للسفارة يا باشا .......

ولو حصل والقناع وقع من على وشك لاى سبب يبقى اتكشفنا ورحنا كلنا فى داهية وتتعقد العملية اكتر واكتر

ابو نورا : طب انت متاكد يا عبقر من مفعول الدوا بتاعك ده ........ والا .......!!!!

عبقرينو : من غير والا ......... باذن الله كله هايبقى تمام

التلاتة فى نفس واحد " يارب "

***********************

فى نفس اللحظة فى السفارة والجو اتكهرب على الاخر وظابط الامن رفع مسدسه ونشنه على موشى الاولانى والملحق العسكرى والراجل الى معاهم والعساكر واقفة مش فاهمة فيه ايه

الظابط : مكانك انت وهو ........انزل على ركبك من ليه ...... وحط ايديك على راسك منك له

موشى الاولانى من غير مايلف للظابط لا هو ولا الراجل اللى معاه وبصوت وشوشة : اول لما اديك الاشارة تاخد ليفة وطيران على البوابة وانا هاغطى ضهرك

وخلى سوكة يجهز ......... فاهم يا مجنص ... ودلوقتى انزل على ركبك وخليك مستعد

مجانص بوشوشة برضه وهو نازل على ركبه : بس ليفة ده مش هايجرى ...... انت عارف احنا عاملين فيه ايه يا بوند

بوند : اتصرف ......... فى اقل من نص دقيقة تكون فى العربية .......فاهمنى

الظابط وهو بيشخط فى بوند اللى كان فاكره موشى : سيب الملحق العسكرى ......... ولف ورينى وشك وشيل القناع اللى انت لابسه ده

بوند بيلف بهدوء وفجأة .........لمح مسدس موشى الحقيقى اللى كان طيّره من ايديه على بعد خطوتين منه

الظابط خد باله ولسه هايقرب ياخد المسدس بوند قام متشقلب لقدام وخطف المسدس قبل الظابط " دلوقتى يا مجانص "

وراح ضارب رصاصة على مسدس الظابط طيّره من ايديه وببوز الجزمة بين رجلين الظابط " سامحنى مالكش ذنب بس للضرورة احكام "

الظابط اتكوم فى الارض وبوند زاى الطاحونة .....طاخ طيخ بالبونيات والاقلام والشلاليت فى العساكر اللى اترمو على الارض وكله بيتوجع وكوهين شاف المنظر ريالته نزلت واغمى عليه

فى نفس اللحظة مجانص لقى ليفة هايعطله فى الجرى قام مديله بالبونية على اول قفاه خلاه اغمى عليه وراح شايله على كتفه زاى العيل الصغير

وطيران على العربية وكان سوكة فاتح الشنطة

مجانص : اتحرك يا سوكة ........ ساعدنى نحطه فى الشوال ونربطه

سوكة :ارميه كده فى الشنطة دلوقتى.... ابن المعفنة ده ......... فين بوند ؟؟؟؟

بوند وهو بينط من فوق كبوت العربية وبيفتح الباب اليمين قدام : طير ياسوكة ........ رقبتنا كلها بين ايديك وموشى الحقيقى كان بيفوق وانا جاى عليكم

سوكة راح فارك بالعربية امريكانى وصوته فى لهفة : واضح انه فاق على الاخر ........ ال بى ام السودا بتاعته جاية صاروخ ورانا ......... يالا يا عزيزة وريهم حلاوتك ........

وطبطب على دركسيون عزيزة وعنيه بتبرق بلهفة وشيطنة



يتبع