نصائح ذهبية عند الذهاب للصنايعية
الاعضاء الكرام السلام عليكم . الحقيقة الموضوع ده جه فى بالى بعد ماقريت مشاركة الاستاذ محمد اللى الميكانيكى ضيع له سوستة التيل بتاع الفرامل لذلك قلت اقول شوية حاجات كده مهمة عن التعامل مع الصنايعية وصدقونى ياجماعة دى خلاصة تجاربffice ffice" />
اولا : قبل ماتختار الصنايعى لازم تحدد مميزات وعيوب الصنايعى اللى انت رايح له وبعدين تعمل مقارنة بين كل الصنايعية وتشوف مين فيهم مميزاته اكتر من عيوبه ( طبعا مفيش صنايعى بلا عيوب ) يعنى مثال فى صنايعى شاطر بس مهمل او بيصحى متأخر او بيشرب حاجة لامؤاخذة يعنى كذلك فى صنايعى لسانه طويل وفى بقى وده لسه حاصل معايا الصنايعى التنك يعنى متكبر وفى الشاطر بس غالى وفى اللى مشواره بعيد وفى الحرامى اللى يسرقك . هتعمل مقارنة وخليك مع اللى ترتاح له بس ابعد عن المهمل و ابو لسان طويل بقية الصفات ممكن تتغلب عليها
ثانيا : حدد اليوم اللى ناوى تروح فيه واصحى بدرى قوى عشان تلحق تحجز دور فى الورشة وكمان عشان بتوع قطع الغيار بيقفلوا غالبا المغرب (خصوصا بتوع الاستعمال) وافتكر دايما المثل القائل النهار له عينين
ثالثا : خلى معاك مناديل ورق كتير وفلوس فكة كتير خمسات وعشرات عشان ماتتزنقش وانت بتحاسب او وانت بتدى بقشيش او وانت بتشترى قطع غيار وخد معاك لو ممكن اى علب بلاستك صغيرة وهنقول ليه
رابعا يستحب اصطحاب حد من اصحابك معاك ماتروحش لوحدك خد واحد او اتنين لان وارد جدا انك تحتاج واحد يجيبلك حاجة ومينفعش انت تسيب العربية خالص
خامسا : اهم حاجة انبه عليها هو بلية احذر بلية اللى هما العيال الصغيرة اللى شغالين فى الورش بيعملوا بلاوى اقل حاجة بيلطش بايده اللى عليها شحم طبعا على جسم العربية وياسلالالالام بقى لو دخل وليط الفرش ببقى عايز اقتله عشان كده ياررررريت تلبس الفرش اكياس بلاستك عشان تحافظ عليه
سادسا : لما الصنايعى يبتدى يفك عينك عليه واى حاجة يفكها صغيرة بالذات المسامير والبلاستكات بتاع الفابريكة دى حاجات اغلب الصنايعية بيرموها خدها انت وشيلها اما فى العلب الصغيرة او المناديل وياريت تبقى فاكر مكان كل حاجة
سادسا : اذا اراد الصنايعى شراء قطعة غيار ونصحك بمحل معين طبعا خده على راحته وروح انت لف على المحلات وخد فكرة وشوف مين الرخيص سابعا : اى حاجة تطلع من العربية ماتعملش زىى وتتكسف تاخدها خدها وخليها عندك هتحتاجها
ثامنا : طبعا لازم تجرب العربية كويس قبل ماتحاسب
تاسعا : دايما الصنايعى لما يغلب فى العطل يرميه على اى حاجة تانية يقولك دى عفشة مثلا او على قطع الغيار يقولك دى مش الاصلى . كل ده اونطة حاول تعرفه انك فاهم وواثق من كلامك
عاشرا : نسيت اقول ياريت لو الحاجات اللى هتعملها كتير اكتبها فى ورقة عشان ماتنساش حاجة
حادى عشر : لو الشغل ماخلصش فى نفس اليوم واضطريت تبيت العربية عند الصنايعى تتاكد انها جوه الورشة ولو بره الورشة افصل البطارية واقفلها كويس وياريت لو تعمل كبسة بليل وتروح تبص عليها عشان مافيش حاجة تتقلب من العربية
ثانى عشر : طبعا عند الحساب حاول تفاصل لو لقيت الصنايعى بيستهبل وحسسه انك فاهم الاسعار كويس وياريت تذكر له اسم كام صنايعى تانيين وانك فضلته عليهم هيجيب ورا على طول .
طبعا ده اللى جه فى بالى دلوقت واكيد فى حاجات تانية والبركة بقى فى باقى الاعضاء الكرام
__________________
لا اله الا انت سبحانك انى كنت من الظالمين
|