السلام عليكم ورحمة الله وبركاته
الاكسيل الهاتش باك اللى معايا دلوقت عملت فى حدود 2000 كيلو
وطبعا يعتبر ظهرت اغلب مميزاتها وعيوبها ليا
وانا حبيت انى اشاركم المميزات والعيوب
علشان اللى ناوى يشترى الاكسيل يشوف المراجعه ويقرر على اساسها
اولا المميزات
1:شكل الهاتش باك مميزجدا خصوصا مع الجنوط اسبور بالذات
مخلية العربيه ثابته كويس جدااا وده لان الجنوط الاسبور من النوع اللى خارج سنه بره الرفارف فبيدى ثبات كويس جدا فى المنحنيات وشكل شيك جدا.
2:اسعار قطع الغيار رخيصه جدااااااا ومحستش الى الان باى فرق بينها وبين ال 128 نهائيا بخصوص الاسعار ومتوفره عند كل المحلات
3:الصيانه بتاعتها بسيطه جدا ومفيهاش لعبكه لان العربيه عباره عن كربراتير ومفيهاش كمبيوتر ولا العك ده كلو وممكن اى حد عندو خبره بسيطه بالسيارات يشتغل فيها بدون مشاكل وبدون صعوبات
4:الماتور على اد ما انه 1300 سى سى الا انه وقت ما بتحتاج تشد بيه بتشد وبيبقى راسك براس اللانسر والهيونداى و اللانوس وكل الحاجات ديه بس خلى بالك الماتور نشيط بس لغاية سرعة 120 بعد كدا الماتور سرعان ما بيفقد قوته وبيبقى بطه بلدى وبيبقى التسارع بطىء جدا بعد ال 120 اما قبل ال 120 فبيكون ممتاز
5:القعده من الداخل مريحه الى حد ما بس مش قوى يعنى نقدر نقول متوسطه
6:العربيه شغالة عادى جدا ببنزين 80 بس بتبقى محتاجه تظبط رجلك على دواسة البنزين ليس اكثر من ذلك
7:العربيه اعتمادية جدااااا وقليلة الاعطال لابعد حد تتخيلوه
يعنى اللى عاوز يسافر بيها هتستحمل سفر ومشاوير وكل حاجه بس اهم حاجه ميكونش الحاجات الاساسية بيظه زى مثالا مراوح التبريد او دائرة الاشعال او الزيت قديم
8:قطع الغيار على اد ما هى رخيصه بس معمرة جداااا مقارنة بالفيات وتعتبر هى هى الاسعار او ارخص كمان يعنى ارخص وتعيش اكتر
نيجى بقى للعيوب
1:العربيه واطيه جدا على الارض ولو حملت 4 فلا مفر من اى مطب حتى لو كان صغير هتحك هتحك مفيش مفر
2:العفشه طرية اكثر من اللازم وبتاخد وتدى بسهولة يعنى مش محجرة او ناشفه كده وتقاوم الطريق لا تلاقيك مثالا لو ماشى على طريق بسرعه وفيه ارتفاعات وانخفاضات بسيطه تلاقى العربيه بتتنطط معاك
3:الكربراتير الاتنين باب الباب التانى ساعات بيعلق منك فتلاقى السلانسيه زاد شوية وده بيحصل لما بتكون طول عمرك ماشى فى زحمة وكدا فضغطك على دواسة البنزين بسيط فبالتالى اللى بتستخدمه الباب الاول فقط فى الكربراتير اما لما بتجرى فى طريق سريع وبتدوس جامد على دواسه البنزين والعربيه بتبقى محتاجه بنزين اكتر فبالتالى باب الكربراتير التانى بيفتح فبيعلق بقى لانه مشتغلش بقالة فتره وطبعا حلها انك تروح عند الميكانيكى ويزيتلك الباب التانى وخلص الموضوع
4:التكيف بتاعها وحش جدااااا وضعيف جداااااااا وعامل بالظبط زى ما تبقى عطشان وتشرب من البحر المالح هو كده بالظبط يعنى تبقى حران وتيجى تشغله متبقاش عارف كده سقعه ولا سخن فبالتالى مالوش لازمه وكمان بيخلى العربيه بطه بلدى لما تشغله بيخليها تقيلة جداااااااااااااااا ومتعرفش تشد بيها نهائيا وحل التكيف انك تشيل دايرة التكيف بتاعها كلها وترميها وتجيب دايرة تكيف كامله جديده زى مثالا ساندن يبانى او تجيب دايرة تيوتا مستعمله وتكون الدايرة اللى هتجيبها بتشتغل على فريون 134 مش فريون 12 القديم
5:الصالون بتاعها خصوصا التابلوه من اردىء انواع البلاستيك اللى عرفتوا البشرية لدرجه انه بيشقق من الشمس
7:بالنسبه للهاتش باك فخلى بالك الاكصدام الخلفى بالرفارف الخلفية حافظ عليهم كويس جدا لانهم غاليين وصعب تلاقيهم السيدان عادى الاكصدام الخلفى والرفارف موجوده بس الهاتش باك موجوده عادىجدا
وبكده تنتهى مراجعتى للعربيه الاكسيل الهاتش باك
وانا شايف من وجهة نظى ان اغلب عيوبها يمكن حلها مثالا لو العربيه واطيه ركب علايات لو التكيف وحش غيره بواحد من الجداد لو باب الكربراتير التانى علق فهتروح تزيته عند المكانيكى وانت واقف ومش هيكلفك حاجه يعنى نقدر نقول عيوبها مش جوهرية وغير مؤثرة نهائيا فى العربيه لان العربيه اعتمادية جداااا وفعلا فى رائى الخاص تعتبر افضل عربيه فى فئة 25 الى 30الف
افضل من الفيات اللى قطع غيارها مضروبة ومش بتعيش نهائيا
وانا فى راى الخاص اديها تقييم
8 من 10
بس فيه حاجه عندى انا بقى مش عارف ديه حلها ايه وهى
ان عداد السرعة شغالة كويس وبيقرا السرعه كويسه بس المشكلة فى عداد الكيلو متر هو اللى بيلف بسرعه يعنى ممكن فى مشوار ميعديش 20 كيلو يقرا 300 او 400 كيلو ومش عارف لغاية دلوقت العيب من ايه بالظبط هل من العداد ولا من التروس اللى فى الفتيس
طيب لو من العداد او التروس ليه عداد السرعه شغال مظبوط وعداد الكيلو متر بيجرى بسرعه مع العلم عداد الكيلو متر وعداد الزيت بيقروا مع بعض بسرعه