[Mido Madrid]

المشاركة الأصلية كتبت بواسطة borio1704 موتور التربو ما يفرقش كتير عن الموتور العادي... كل الموضوع إن موتور التربو متركب عليه تربو بس التربو ده بيعمل إيه؟؟؟ وبيشتغل إزاي؟؟؟ التربو Turbo عبارة عن مروحة قوية (توربينة Turbine) مهمتها إنها تزود كمية الهوا اللي داخل على السلندر عشان يزود قوة الحرق داخل السلندر إزاي؟؟؟ هو مش لو زودنا الهوا الحرق ممكن يقل؟؟؟ لأ.... كل ما كان الهوا أكتر بنقدر ناخد حرق أفضل للبنزين الموضوع عامل زي الفرق بين الفحم لما تولعه... بيبقى كده وبعدين لما تهوي عليه أو تشغل قدامه مروحة هيولع جامد ويشعلل.. زي كده طيب خلينا نشوف الأول هو الموتور العادي الهوا بيدخله إزاي؟؟؟ ده شكل الموتور العادي فيه حاجة إسمها Intake Manifold أو مانيفولد السحب وده اللي بياخد الهوا من الفلتر ويوزعه على السلندرات طيب هو بيسحب الهوا إزاي؟؟ ده شكل دورة الاحتراق للموتور اللي يهمنا هو اللي بيحصل في المرحلة رقم 1 ورقم 4 في المرحلة رقم 1 السلندر بينزل لتحت ويسحب معاه الهوا.. بنفس فكرة السرنجة لما بتشفط الدوا كدا الهوا دخل السلندر وبعدين عملية الحرق بتتم ومش هندخل في تفاصيلها لإن ده مش موضوعنا دلوقتي في المرحلة رقم 4 السلندر بيطلع لفوق ويطرد العادم من فتحة تانية اللي بتودي على الشكمان طيب ... أمال إيه حكاية التربو؟؟؟ زي ما قلنا التربو هو عبارة عن مروحة.... بس الفكرة العبقرية هنا بقى إني استخدم العادم في تشغيل المروحة إزاي؟؟؟ بص على الصورة كده التربو عبارة عن مروحة مزدوجة على عمود واحد... واحدة متوصلة على العادم والتانية متوصلة على هوا السحب ولما تدوس بنزين العادم بيطلع كتير ويبدأ يحرك المروحة... اللي هي كمان بتحرك المروحة التانية اللي على السحب وتدخل هوا زيادة (تضغط الهواء) التربو عشان يشتغل كويس لازم الهوا اللي داخل في السحب يكون دافي، إنما اللي بيحصل إن الهوا بيبقى سخن جدا ويمكن يوصل لحد 150 درجة بسبب حاجتين: ضغط الهواء بيرفع درجة حرارة الهوا لما الموتور بيسخن العادم السخن بيسخن التربو جدا لدرجة إنه يوصل لدرجة الاحمرار... وطبعا الهوا هيسخن هوا كمان بص على الصور دي طيب إيه الحل عشان نبرد الهوا؟؟؟ الحل في تركيب سربنتينة يدخل فيها هوا السحب ويبرد فيها قبل ما يدخل السلندر.. السربنتينة دي بيسموها "مبادل حراري" أو Heat Exchanger وساعات بيقولوا عليها Intercooler عشان كده تلاقي العربيات اللي فيها تربو بيكون فيه فتحة في الكبوت... عشان المبادل الحراري يشتغل زي كده طبعا الفتحات دي ممكن أي حد يعملها في العربية ولو حتى منظر مش بجد طيب... إزاي أعرف إن الموتور ده فيه تربو بجد؟؟ الموتور التربو حتلاقيله صفارة مميزة بتزيد مع زيادة دوران الموتور... وغالبا حتلاقيها متأخرة سنه صغيرة عن الموتور... وده اللي بيسموه تأخير التربو أو Turbo Lag ...

رد كافي وشافي وشكرا على المعلومات القيمه دي والصور والشرح وكل حاجه