النهارده وأنا بجدد الرخصه فى مرور محرم بك الاسكندريه كنت فاكر ان البلد بعد الثوره بقت حاجه تانيه
لقيت ان مفيش اى حاجه اتغيرت رشاوى وشغل تحت الترابيزه بقى فوق الترابيزه وعلني وتعطيل الناس ومصالحهم وراحة المواطن أخر حاجه الموظف بيفكر فيها
وياريت لو كان فيه تطهير نشوفه بعنينا مايبقاش كلام فى الاعلام
طبعا مش هاقول على المعتاد اللى كلنا عارفيه فى المرور
لكن المصيبه ان موظفة الشباك اللى بتجدد الرخصه كأنها شغالها لحسابها وبتاخد 100 ج و 50 ج عشان تخلص ورق الزبون واللى مش بيدفع يطلع عين أمه ويجيلها 3 او 4 ايام على ما يخلص رخصته لانها طبعا مش فاضيه غير للى بيدفع
انا مستعد لو معايا اكتر من شخص نروح نعمل فيها بلاغ بس بعد ما اطلع الرخصه
والجديد يا جماعه ان الموظفه دى بتقسم عيني عينك مع المراجعه بتاعتها بالحق والتقوى يعني ال 100 تتقسم 50 و 50 بالعدل ناس حقانيه اوى والله العظيم فى خلال نص ساعه بس وانا واقف اخدت اكتر من 300 ج