رد: مغامرات المفتش برومبو
7
مكتب د / بولبولان رئيس المباحث ورايح جاى فى المكتب عمال يحرق فى سجاير لما الاوضه عبقت دخان
الباب خبط وبصوت عصبى عالى قال " ادخل يا ابو نورا "
ابو نورا : تحت امرك يافندم
د / بولبولان : من غير ماتقعد ....الموضوع خطير ياسيادة الرائد ........ الملحق العسكرى الاسرائيلى اتخطف
ابو نورا : ومين اللى خطفه يافندم ........ وايه مصلحته فى كده
د / بولبولان : ده اللى عايزينك تعرفه وبسرعة
ابو نورا : حاضر يافندم هابدأ اعمل تحرياتى ....... بس كنت محتاج شوية معلومات عن الموضوع
د / بولبولان : الملف ده فيه كل المعلومات اللى نعرفها ........ المشكلة ان مافيش قدامك غير 48 ساعة بس والراجل لازم يرجع
ابو نورا : كام ؟؟؟؟ 48 ايه ؟؟؟؟ مستحيل طبعا موضوع زاى ده ماينفعش فيه الكلام ده خالص
د / بولبولان : للاسف هو ده كل الوقت اللى قدامنا ....... لان السفير الاسرائيلى بيهددنا بعد المهلة دى انه هايرفع الموضوع لمجلس الامن ........ يعنى ممكن تبقى حرب بجد
ابو نورا : بس المهلة دى صغيرة جدا ....... ومالحقش اعمل فيها اى حاجة
د / بولبولان : اتصرف كل اللى هاتطلبه هايكون بين ايديك ........ المهم قبل المهلة ماتخلص الراجل يكون ظهر
هرش ابو نورا فى راسه وبص بخبث لـ د / بولبولان وقاله بصوت حاول يخبى رنة اللهفة فيه
" مافيش غير شخص واحد هو اللى يقدر يحل المشكلة دى "
د/ بولبولان : لايمنى عليه بسرعة مافيش وقت
ابو نورا : برومبو..........
د / بولبولان : مين ياخويا ؟؟؟؟؟!!!!!!!....... انت هاتصطاد فى المية العكرة والا ايه!!!
ابو نورا : ابدا يافندم والله ........ بس هو الوحيد اللى يقدر يحل اللغز ده وفى وقت اسرع من كده وسعادتك مجرب وعارف
د / بولبولان : ماشى ياسيدى موافق ....... بس اعمل حسابك المهلة خلص منها ساعتين يعنى مش فاضل غير 46 ساعة
ابو نورا : بس ليا طلب صغير عشان اقدر اقنعه يقوم بالعملية دى
د / بولبولان وهو بيبص فى الساعة : اطلب بسرعة مافيش وقت
ابو نورا : سعادتك تكلم معالى وزير الداخلية يلغى القرار بتاع قفل مكتب برومبو وسحب الرخصة بتاعته
د / بولبولان : ولو انها صعبة اوى بس المشكلة اللى اتحطينا فيها تخلى مافيش حاجة مستحيلة
ابونورا : وحاجة كمان
د / بولبولان : ايه تانى ........ خلص طلباتك مرة واحدة ..... ايه الخنقة دى!!!!
ابو نورا : يتعمل تعيين لبرومبو فى المباحث فى وظيفة مفتش غير متفرغ
عشان نضمن انه بعد كده ماحدش يقدر يرجع فى كلامه بالنسبة ليه وهو كمان يشتغل وهو مطمن على الاخر
وكمان ماحدش يلسن علينا بكلمة ويقول كانى ومانى
د / بولبولان : انت كده بتضغط على اعصابى .......بس كلامك منطقى .... خللينى اكلم الوزير الاول
" الو ....... مساء الخير معالي الوزير ........ فى اقتراح بخصوص قضية الملحق العسكرى .........
لا لسه ........ برومبو هايتولى العملية .........ايوة يافندم برومبو............ ايوة نلغى القرار ونعينه فى المباحث مفتش غير متفرغ ......................... ......................... .........
حاضر يافندم قرار التعيين هايكون جاهز حالا.... الف شكر لمعاليك ........ ان شاء الله هاتابع معاليك بكل جديد لحظة بلحظة .......... مع السلامة سعادتك "
خلاص يا ابو نورا اى طلبات تانية ........اوضة العمليات جاهزة ليك ولبرومبو وفرقته من اللحظة دى ........
وكل امكانيات الادارة تحت تصرفكم خلال الساعات اللى جاية .......... اتوكل على الله
ابو نورا وابتسامة النصر على وشه : تمام يافندم
يتبع
__________________
عجبي علي العجب العجيب العجاب
لما الحقيقة تطل بعد احتجاب
و تروح و تحلا وفجأة تصبح مفيش
كمثل طراطيش بحر ياما خد و جاب
عجبى !!( صلاح جاهين )
|