رد: السيارات الخليجى مالها وما عليها
هاكلم من وجهة نظري كمستهلك
مينفعشي اشتري عربية بكام الف تحويشة عمر من غير ضمان
و حتي لو هاعمل كده ميكونشي مثلا في عربية زي اللانسر فرق السعر بين التوكيل و الخليجي كلام فاضي
لكن مثلا ممكن يكون في عربية زي الاوكتافيا و الجيتا و الباسات و البيجو 307
فرق السعر بيوصل ثلاثين الف جنيه
و برده ساعتها هاكون حاطط ايدي علي قلبي اولا ليظهرلي عيب يكلفني اكتر من التلاتين الف اللي وفرتهم ،، ثانيا اني هاحس اني لقيط مش عارف عربيتي اعملها صيانتها و قطع غيارها الصح فين
خلينا نتفق علي حاجة تانية برده
كلمة الضمان نفسها ليها شق اخر
التوكيل بيستفيد من الضمان لانه بيلزمك انه تعمل صيانه عنده
و اعفن توكيل بياخد بس مصنعية مش اقل من 100 جتيه بس في تغيير الفلتر و الزيت
و الحسابه بتحسب
فاللي يقول التوكيل الفلاني عامل ضمان خمس سنين او او
يعمل في حسابه انك هتقعد خمس سنين تكع للتوكيل عشان تحافظ عالضمان
يعني التوكيل بيستفيد من الضمان غير ان كل ما المدة تطول امكانية اثبات عيوب الصناعة هتقل
انا مثلا في عربيتي استفدت من الضمان لاقصي درجة و غيرت حاجات كتير
بس لو حسبتها هالاقي نفسي لو كنت بعمل الصيانات بره فرق الفلوس اكتر من الحاجات اللي غيرتها عالضمان
و كان فيه مهندس صديقي شغال في غبور ،،
قلي انهم عملوا احصائية لقوا ان اغلبية السيارات بتتوفق عن الصيانة في المراكز المعتمدة بعد الاربعين الف كم
و ده كلام منطقي لان مثلا عشرين الف كم فترة كفاية لظهور عيوب الصناعة ،، و معناها ان غالبا العربية حالتها مستقره
فالحل المثالي من وجهة نظري ،،
و مستخدم في دول كتير
هوا الغاء نظام التوكيل الوحيد الأبدي للماركة الفلانية
و استبداله بنظام الموزعين المعتمدين ،، كذا موزع لنفس الماركة
و ده بيخلق تنافس في الاسعار و الخدمة و المواصفات و في نفس الوقت يضمن حق العميل
مثلا هيونداي في السعودية ليها تقريبا ثلاث موزعين في كل منطقة من المملكة
و تلاقيهم في المنتديات السعودية ،،
كل كلامهم انه عربية مواصفاتها احسن عند انه موزع ،، و مين احسن سعر و مين افضل خدمة
|