[أدهم صبرى]

الموديلات الجديده عباره عن ورق ولكن شكلها WOW.
الموديلات القديمه حاجه بتفوت فى الصخر ولكن شكلها مش عاطفى.
الموديلات الجديده المفروض اللى يشتريها يكون محتاجها فعلاً زى مثلاً رجال الأعمال والأطباء وأساتذة الجامعات لإن الناس دى بتبقى محتاجاها فعلاً وبيبقى عاوز حاجه شغاله وماتقفش منه لإن وقته بيبقى بفلوس.
الموديلات القديمه بيجيبها الموظفين وصغار التجار وأحياناً الطلبه لإنهم محتاجين حاجه سعرها معقول وقطع غيارها رخيصه.
ولكن إنك تلاقى واحد على قد حاله وجايب عربيه ألنترا أحدث موديل أو كورولا أو غيرها فده لإن كل واحد بيشوف التانى راكب عربيه أحدث موديل تلاقيه بيقولك إشمعنى أنا مكونش زيه وتلاقيه يحط تحويشة عمره ويستلف علشان مقدم العربيه ويدفع معظم مرتبه فى الأقساط مع إنه مش محتاج العربية دى.
بالظبط زى أما تلاقى طالب إعدادى معاه أيفون أو أحدث موبايل نوكيا وهو مش محتاج معظم الإمكانيات اللى فيه.
هى دى عقلية ناس كتير فى مصر وعلشان تتغير السلوكيات دى محتاجه وقت وتوعيه إعلاميه.
بس ده مش مبرر للحكومه إنها ترفع سعر البنزين والسولار.
لما تبقى الحكومه توفر للناس مواصلات أدميه وتغطى الجمهوريه كلها تبقى ساعتها ترفع الدعم عن البنزين لإن اللى هيجيب عربيه ساعتها هيبقى الغنى اللى معاه فلوس وعاوز يعمل لنفسه برستيج ومش هتفرق معاه الأسعار حتى لو بقت عشر أضعاف أما معظم الناس اللى معاها عربيات دلوقتى فهى ناس محتاجاها فعلاً لإن المواصلات الحكوميه زباله والتاكسيات ذل ومرمطه.