[المواطن مصرى]

فيه كذا فكره ممكن اقول لحضرتك عليهم ..

ممكن حضرتك تبدأى اولا انك تشوفى مكتب كمبيوتر او نت كافيه فى المنطقه عندك تتفقى معاه انه يعمل عنده اعلان عن كتابه الرسائل و الورق و تصميم الاعلانات و كتابه مشروعات التخرج و الملخصات الدراسيه و الحاجات دى و هو يجيبلك الشغل مقابل نسبه هوه ياخدها (مثلا لو كتابه الورقه و طباعتها بجنيه واحد هوه ياخد النصف و انتى النصف و هكذا) و بكده هيكون عندك عينات شغل معموله لناس ..

الخطوه التاليه : ممكن حضرتك تشوفى مراكز الدروس الخصوصيه و مجموعات التقويه اللى فى منطقتك و تعرضى عليهم شغلك فى كتابه الملازم و المذكرات و الملخصات الدراسيه للاولاد و لو فتحتى شغل مع الناس دى يبقى خير و بركه و يا سلام لو تعرفى حد مدرس او مدرسه بيدى دروس خصوصيه حضرتك تكتبيله المذكرات و الملخصات اللى بيوزعها على الولاد ..

ممكن كمان حضرتك تشوفى المدارس الخاصه و الحضانات و تعرضى عليهم فكره كتابه مذكرات و ملخصات و حاجات من دى

ممكن حضرتك تشوفى مراكز الريجيم و التخسيس و العلاج الطبيعى و تعرضى عليهم شغلك لان الناس دى بتحتاج تكتب برامج تعذيه و تمارين و عروض كثيره كل اسبوع بتتغير

لو تعرفى فوتوشوب و صور و تصميم و كده ممكن حضرتك تشوفى مكتب دعايه و اعلان تعرضى عليه شغلك و هو يجيبلك شغل تصميم يفط و اعلانات مقابل نسبه تتفقى عليها معاه

ممكن كمان تشوفى ستوديو تصوير تتفقى معاه على مونتاج الصور (خصوصا صور الاطفال و الافراح) مقابل نسبه على كل صورة (لو طباعه الصوره العاديه مثلا جنيه تبقى الصوره المعموله فوتوشوب 2 جنيه و هكذا )

و ربنا يوفقك ..