الاخوة الافاضل
السلام عليكم ورحمه الله وبركاته
اتابع حديثي وتجربتي مع السيارة وعمل صيانه 5000 كيلو .
الحمد لله والشكر لله انا عملت الصيانه وفي البدايه عاوز اقولكم اولا اخبار العربيه عند ال5000 كيلو
العربيه كفاءتها مازالت كما هي ولم اشعر حتي الان بظهور اي عيوب والحمد لله.
اما بخصوص الوكيل فربنا يتولانا . ودلوقتي مع الي حصل في التوكيل
قمت بالحجز قبلها باسبوع تقريبا وبالفعل رحت الي الوكيل وكان المعاد الساعه 10.30 صباحا وانا من النوع الي مبحبش اروح متأخر او علي المعاد ورحت في تمام الساعه 8.30 صباحا اي قبل الميعاد بحوالي ساعتين. وانتظرت قدوم الفنيين والمهندسين وبالفعل ظهر اول الفنيين في تمام الساعه 9.30 علما بان المركز بيبدأ عمل الساعه 9 صباحا ما علينا وفي تمام الساعه 10.45 كان عليا الدور لانني كنت الحجز رقم 2 وبالفعل جت المهندسه عشان تستلم مني العربيه وبدات تعمل اختبار لكل شيء مريات ومساحات وانوار وكان سؤالها في اي مشاكل من العربيه قلتلها في الحقيقه انا بشتكي من ضيق زور تنك البنزين لاني باخد وقت طويل علي طلمبه البنزين وبعطل الناس الي بعدي في البنزينه وكمان فكرتها بمشكله قربه سنتر الباب اليمن الامامي الي هما بوظوها في صيانه ال1000 ك وطلبت منها انهم يشدو علي الهاند بريك لانها خفت شويا خوصا اني بركن علي رامب بالعجلتين الخلفيين وعاوز المهندس يبص علي قواعد الموتور والفتيس وكان ردها بخصوص ضيق الزور بتاع التانك ده مش عيب ده مقصود في الموديلات الجديده خوفا علي طلمبه البنزين !!!!!!!!!!!!!!!!! وخلي العامل بتاع البنزينه يخرج المسدس شويا ويظبطو علي البطيء فطبعا هنا انا انفجرت في الضحك ايه علاقه طلمبه البنزين بالتفويل اكيد ده اختراع او اكتشاف محدش لسا اكتشفو غيرهم وكان ردها علي علي قربه السنتر انو للاسف يا فندم لسه قطع الغيار موصلتش من الصين قلتلها طيب وبعدين دي مشكله كبيرة لاني مبركنش تحت البيت واكتر من مرة كنت بنسي اللوك مفتوح وكانت الاجابه والله يا فندم مش عارفه اقولك ايه ممكن حضرتك تتابعنا بالتليفون واول ما توصل ان شاء الله هنركبهالك وكان لابد اني امسك اعصابي لحد اما اخلص المهم دخلت العربيه جوا ودخلت انا الاستراحه وبعد ياعه تقريبا جه المهندس وطلب مني سؤال ايه مشكله قواعد الموتور والفتيس قلتلو لا شيء انا مبشتكيش خالص منهم بس انا طالب القاء نظرة مش اكتر قالي طيب والهاند بريك قلتلو اني لو مشدتهاش علي الاخر ممكن العربييه تتحرك قلي هبص عليها
وقبل ما جرس البريك يرن ب5 دقائق خرجت العربيه برة للتجربه وجه المهندس قالي العربيه خلصت غيرنالك زيت وفلتر زيت وبالنسبه للهاند مفيهاش حاجه وعدنالك عليها وبخصوص السنتر للاسف مش نافع عاوز قربه 2 طرف ولسه مش متوفرة ومعلش هتنتظر معانا ساعه لبعد البريك عشان تستلم العربيه وتحاسب قلتلو ماشي واسمعوا بقي العجب العجاب
دخلت الاستراحه اشرب قهوة لحد معاد البريك ما يخلص اتعرفت علي 2 الي بعدي وكانت شكواهم كالتالي
الاول :- انا عامل 35000ك ولما كنت في صيانه 10000 ك كنت بشتكي من الدسك والاسطوانه وان العربيه بتبطل واخبرتهم وكان فيه مهندس هنا قبل ده قالي مفيهمش حاجه بس هرجلشهملك وهظبطهملك وبردو المشكله ما زالت موجوده النهرده بيقولولي انهم لازم يتغيرو + البليه علما بانني محترف قياده ولفيس علي معظم موديلات العربيات من اول ال127 الي البي ام 740 مفيش عربيه جابت مني دسك واسطوانه وبليه ده تهريج وانهي عربيه تجيب دسك واسطوانه وبليه علي 35000ك الا اذا كان الي سايقها حمار ؟؟؟؟ ده حتي لو حمار مش هتجيب ده عند 35000ك وبدا يتنرفز وصوتو علي جه المهندس وقالو علي فكرة ده مش سوء استعمال ده صلاحيتهم انتهت !!!!
الثاني :-
معاه العربيه اوتوماتك بشتكي عند النقلات انها بتنتش لدرجه ترجك وانتا قاعد قلتلو مهو اي اتوماتك كدا لازم ينتش دي عزم المكنه قالي ايوة بس مش لدرجه ان ضهرك ممكن يتحرك من علي الكرسي
والمندس قالو هوا الموضوع عندك زياده فعلا هحاول اظبتهالك
ودخل واحد ثالث جاي يستلم عربيتو الي كان سايبها عندهم من فترة والحقيقه ان العربيه لسه مخلصتش وكان سؤالي هيا فيها ايه قالي فالفات فتيس وهيا موجوده عندهم من شهر ابريل واحنا في سبتمبر قلتلو وليه مخلصتش قالي مفيش قطع غيار لسه مجتش !!!!!!!!!!!!
واكتشفت قبل ما استلم عربيتي مباشره اني اخر واحد لحق اخر فلتر زيت وان الي بعدي غير زيت بس وغيرش فلتر !!!
واتفقوا ال3 عملاء انهم يطلعو علي مكتب حمايه المستهلك يعملو بلاغ
والله يا جماعه انا شايف ان العربيه كويسه جدا وتناسب كتير من الناس غير المحترفين يعني تناسب واحد تكون اول عربيه بالنسبالو وخسارة العربيه دي في الوكيل
والله يا جماعه العربيه عاوزة وكييييييييييييييييييييييي يل وحترم محترم محترم مش اكتر
وحسبي الله ونعم الوكيل