المشاركة الأصلية كتبت بواسطة genena
اخوتى الاعزاء
انا حبيت اشاركم فى اول تجربه للسفر بال127 للساحل الشمالى
بدايه احب اوضح انى معايا جوليت و عاده بأسافر بيها علشان التكييف و مراتى وولادى(3) بيكونوا معايا
لكن الخميس الى فات كانوا هما بيصيفوا من اسبوع و انا كان عندى شغل و لما فضيت الخميس قررت ان دى احسن فرصه اجرب اسافر بال127 بتاعتى الى لسه جايبها من حوالى شهرين
العربيه مو 1976 ايطالى 2 باب 1050 سى سى و مضبط فيها كل حاجه اول ما اشترتها من سيور لزيوت لكبالن و عفشه
الحقيقه انا جبتها علشان بحب العربيات القديمه و كان معايا قبلها فيات 124 سبور مو 1973 و كنت بروح بيها كل حته
المهم علشان مطولش عليكم انا اتحركت من مدينه نصر فى اتجاه المحورالساعه 6 و نصف مساءا و من الزحمه كنت عند محطه الرسوم الساعه 8 م (ساعه و نصف الموتور ما طفاش)
ابتديت السواقه على سرعه 80كم علشان لسه بدرس العربيه و مش طالبه اى مفاجات
بعد حوالى 30كم من البوابات كنت ابتديت ازهق قمت زودت السرعه ل90كم و بعد شويه وصلت ل 100كم و استقريت على السرعه دى باقى الطريق
الحقيقه لما كنت عايز اطلع من نقل جبت 110 كم و ارجع ل 100 كم
طبعا اخوانا الى معاهم عربيات جديده يضحكوا على السرعات دى لكن نسبه و تناسب بين حجم الموتور و عمر العربيه انا شايف انه انجاز
المهم انى وصلت للساحل ولله الحمد بدون اى مشاكل و رجعت تانى يوم للقاهره سالما غانما
الملحوظات الى حسيتها
1 - الفتيس ال4 غيار ده مموت العربيه و سرعه 100كم = 4000 لفه(انا مركب rpm) و اعتقد لو فيه غيار خامس عادى قوى 120كم بنفس ال rpm
2 - الحراره كانت كويسه طول الطريق و ما فيش سخونه(الردياتير جديد تماما)
3 - لما كنت بمور العربيه و انا نازل منزل جامد بسرعه عاليه كانت ساعات تطفى و لما ادورها تدور على طول و الموضوع ده ما يحصلش لما امور بعد العربيه ما تهدى جامد(يا ريت حد يشرح لى سبب ده)
4 - الثبات كان ممتاز علما ان الجنوط سبور و كاوتش عريض مقاسه حاجه فيها 165/13/55 تقريبا و الله اعلم
اخيرا ارجو اكون افدتكم بتجربتى الاولى بالسفر بال127
سؤال اخير هل يمكن تركيب فتيس 5 سرعات على موتور عربيتى ال1050 و اى الانواع لا تحتاج تعديل فى الحوض
و شكرا
|
السلام عليكم اخ جنينة مش عارف اقولك ايه مشاركتك اذهلتنى لما قرأتها لانى بصراحة ذهلت ليه بقى ؟ اقولك انا من فترة طويلة متعود اجيب سيارة زيرو اركبه كام سنة وبعدين قبل ماتفتح بقها ابعها واجيب واحدة تانية وحاليا معايا ماتريكس زيرو لسه جايبها لكن بعد ماجبتها وخوفى عليها للتخربش او تتخبط فكرت اجيب عربية صغيرة للمشاوير جوه البلد والهرس وفكرت فى ال 127 وقعدت ادور لحد مالاقيت سيارة 127 مو 85 بصراحة حالتها كانت شاذة فابريكة بره وجوه بكرر فابريكة بره وجوه كانت مع واحدة ست المهم الميكانيكى بتاعى قالى متسبهاش خدها باى تمن طبعا خدتها بكتير قوى لدرجة مبقولش لحد على سعرها ليضحك عليا المهم لماركبت العربية طبعا رجعتنى 20 سنة وافتكرت ايام زمان وبقيت فرحان بيها قوى لكن المهم انى بخاف اسافر بيها حاكم انا خواف قوى عشان كده اعجبت بيك وبشجاعتك قوى وخلتنى احب العربية زيادة وشكرا ليك وللمنتدى