[m6r1282]

أنا قربت أحدف أنا كمان

يا جماعة الخير أنا كنت شاري عربية مستعملة نيسان ياباني فهي كانت بتحدف شمال ولما سألت اللي شاري منه قاللي انه ضبط هوا، وعدت الأيام وماكنتش بركب لمدة شهرين يعني كان ركوب بسيط ما حسيتش فيه بالحدفة ...

أول ما بدأت أسافر لمصر بدأت آخد بالي منها ، فا روحت عند ضبط زوايا يدوي مشهور في شبين الكوم قاللي الزوايا كان فيها سنة واتظبطت، بس ماكنتش راضي برده عن الوضع، روحت عند واحد تاني كمبيوتر برده في شبين الكوم ، وقال إن الزوايا تمام
(وبرده فيه حدفه) ...

روحت التوكيل قال نفس الكلام وقال في الغالب المشكلة كاوتش، وكانت الكاوتشات اللي شاري بيها العربية شبه جديده فاستخسرت أغيرهم وقولت أمشي بيها كده وكل فتره كنت أروح التوكيل أظبط زوايا حتى مره ربطوا جامد على الدريكسيون عشان مايروحش مع الحدفه ... ضبط الزوايا في التوكيل كان 3 مرات وغالي وعلى مكنة حديثة على حد قولهم

الشاهد إني لما بأيت أغير أوضاع الكاوتش بتتغير الحدفة ناحية اليمين أو بتخف سواء بعكس الأمامي أو بتبديل اللي ورا مع اللي قدام

- اليومين دول ملاحظ رجه بسيطه في الدريكسيون بداية من سرعة 40
- الحدفة بتاخد الدريكسيون ناحيتها سواء يمين أو شمال (طبعا مع تغيير الكاوتشات) يعني وأنا ماشي لو سيبت الدريكسيون العربية والدريكسيون بيروحوا ناحية الحدفه ...
- الطريق عندي صراحه مش كويس وكنت كلت حوالي 2 أو 3 مرات مطبات من اللي هي عاليه بس على سرعات لا تتعدى الـ 40 كيلومتر
- كل اللي روحتلهم كانوا يقولو المشكلة في الغالب جدا كاوتش، وأنا مش على استعداد أجازف بمبلغ والحالة على الأد يعني ؟؟؟؟

فما قولكم دام فضلكم ؟؟؟؟؟؟؟؟؟؟؟؟؟؟؟؟؟؟؟ كاوتش ولا ترصيص ولا زرجينه ولا إيه ؟؟؟