الاخوة الاعزاء بخصوص الوكيل
حابب احكي لكم تجربتي مع الوكيل في صيانه الـ 1000 كيلو .
اولا انا حجزت ميعاد للصيانه قبلها باسبوع تقريبا لاكون اول واحد وقد تم وكان معادي معاهم الساعه 9 صباحا وكنت هناك الساعه 8:20 صباحا وانا الي فاتح المكان مع فرد الامن انتظرت لحد اما وصلت المهندسه الساعه 9:00 وطلبه انها تستلم السيارة وبل الفعل قمت بتسليمها السيارة ولحسن الحظ المرايه الجانبيه يمين طول طريقي للوكيل كانت شغاله اول ما راحت عندهم فصلت مش عارف ليه
المهم استلمت المهندسه السيارة وبعد كدا حاولت تعرف ان كان فيه اي شكوي من السيارة وانا كنت مجهز كام ملحوظه قلتلها ان الدبرياج ثقيل نوعا ما والتارة بها زنه بصفارة خفيفه وفيه صوت تزييق في المساعدين الخلفيين عند النزول في مطب حتي لو كنت بطيء وان الاسبويلر الخلفي غير مثبت الا من ناحيه واحده فقط . كتبت المهندسه كل ما قولته وطلبت مني دخول الاستراحه .ووصل مهندس الصيانه ودخل السيارة واغلق الباب وروحي يا ساعات وتعالي يا ساعات واحلام تشلني واحلام تحطني المهم صحيت لقيت الساعه 11:30 ظهرا وعرفت من الساعي انهم بيخدو ساعه راحه من 12:00 الي 1:00 بعد الظهر قلت لما اطلع اشوف سبب التاخير وبالفعل قابلت المهندس وسئلته ايه الاخبار وليه التاخير قالي لالالا متقلقش كله تمام بس احنا هنغييرلك المرايه اليمين وللاسف لون عربيتك مش متوفر حاليا فمعلش هتنتظر معانا شويا لحد اما نرشها وتنشف عشان تبقي نفس اللون. تعجبت طبعا من كلامو وقلتلو يعني اد ايه قال بالكتير ساعه.طيب يا مسهل ده طبعا ساعه بعد ساعه الغدا يعني الساعه 2:00 بعد الظهر وبالفعل انتظرت لحد الساعه2:00 2:30 طب استني شويا 3:15 وبعدين بقي فخرجت من الاستراحه فيه ايه يا جماعه انا عاوز امشي
طلبت مني المهندسه الدخول للمكتب معاها فدخلت خير يا بشمهندسه فقالت معلش احنا اسفين علي التاخير اولا وثانيا فيه مشكله صغيرة حصلت هيا الي عطلتنا شويا قلتلها خير فيه ايه قالتلي اصل السنتر بتاع الباب اليمين ادام عطل واحنا بنركب المرايا وكل الوقت ده كنا بنحاول نصلحو بس للاسف لازم يتغيير . قلتلها عطل ازاي مهو كان شغال وانتي استلمتي السيارة علي كدا قالتلي بالفعل كان شغال بس عطل قلتلها خلاص غيروة اعتقد ان ده من حقي قالت طبعا من حقك تغييرة مجانا بس هيا دي المشكله السنتر عاوز قربه 2 طرف وهيا مش متوفرة عندنا دلوقت ان شاء الله لما تيجي صيانه ال5000 ك هيكون وصل ونغيرهولك دخل المهندس قلتلو ينفع كدا يعني ؟ فقعد يعتزر وحاول يرضيني وقالي علي فكرة انا صلحت المرايه مغيرتهاش وهما بيجمعو الباب جوة وهتستلم السيارة بعد شويا واحنا اسفين المهم الساعه 4:10 لقيتو خارج بالعربيه عشان يجربها ركبت معاه وفي اول مطب سمعت صوت التزييق زي ما هوا في المساعدين فقلتله مالصوت زي ما هوا اهو قالي مفيش صوت ولا حاجه لسه مكملش ونزل في مطب تاني وطلع الصوت قولتلو امال ده ايه وهممممم
قالي لالالالالا ده مش مساعدين دي اكرة الباب بتاع الشنطه عاوز يتحط علي الكالون حته شحم بس
المهم رجع ودخل الورشه وحط الشحم وطبعا انا مش مقتنع وخرج مرة تانيه ركبت معاه ولقيت نفس الصوت قالي بص انا هخفيهولك ودخل تانيه 5 دقائق وخرج معاه الميكانيكي ودخل تاني 5 دقائق وخرج تاني بالميكانيكي ودخل تاني وانا تعبت بصراحه بعبت جدا لدرجه اني مكنتش شايف المهم طبعا هما معاد الانصراف الساعه 5 وبقينا 4:45 دقيقه المهم باب الورشه اتفتح لقيتو رايح علي العربيه ومعاه جوز مساعدين جداد باكياسهم قلتلو هتغير قالي اه قلت في سري (يا سبحان الله) مكان من الاول المهم غير المساعدين وخرج وركبت معاة وبالفعل اختفي الصوت وقالي انا فصلتلك السنتر بتاع الباب اليمين لحد اما تيجي ان شاء الله في صيانه 5000 ابقي اغيرهولك واحنا اسفين المهم براجع علي الزنه الي في التارة لقيتها زي ما هيا ايه ده يا بشمهندس قلي لالالالا انا بصيت عليها ده عادي مفيهاش اي مشكله الزنه دي طبيعي فببص علي الاسبويلر لقيتو زي ما هوا قلتلو طيب وده قالي ايه ده هما مربطوهوش بيبص فيه لقاه مكسور من المسمار قالي ده مكسور والله مش مننا قلتلو غيرو بكام سعرو قالي 350ج بس حرام اني ادفعك المبلغ ده وهوا شغال انتا ممكن باي ماده لاصقه تلحمه بس اوعي تجيب حاجه علي الزجاج الخلفي المهم انا مكنتش قادر اتكلم اصلا وعاوز امشي باي طريقه. يعني باختصار انا غييرت زيت ومساعدين خلفيين وبوظت السنتر كل ده من الساعه 8:20 لحاد الساعه 5:30 وزي ما فتحت المركز قفلتو يعني المفروض اطالبهم بمرتب يوم عندهم عمركو شوفتو سيارة تروح للوكيل سليمه تعمل صيانه تطلع بايظه
حسبي الله ونعم الوكيل