المشاركة الأصلية كتبت بواسطة AboNoRa
والله يا دكتور الحوادث مفيش اكتر منها بس انا بدورلك فى دماغى على حادثة مكونش حكيتها قبل كده ptmnlo123per1127
خد عندك
كنت ماشى فى طريق المهاجرين وده بيربط بين المرج وطلعة الدائرى من ناحية مؤسسة الزكاة واللى يعرف الطريق ده هيعرف قد ايه انه طريق لعنة بكل ما تعنية الكلمة من معانى هو متسفلت بس فيه مطبات وتكسير فى اماكن متفرقة وباشكال متنوعة ده غير انه بيجمع بين عربيات ومتوسيكلات وميروباصات اجره من اول الصغيرة السوزوكى والصينى اللى معرضين الكاوتش والجنوط وطايرين دائما على الطريق للميكروباصات الكبيرة المدغدة وملهاش فوانيس ولا اكصدمات من كتر الحوادث اللى بتعملها لعربيات النقل الثقيل للبشر للتكاتك لكل شىء
وكله بيجرى وكله بيخبط فى بعضه بشكل عجيب لدرجة انك لو بتستخدم الطريق ده رايح جاى كل يوم مش هيعدى اسبوع بالكتير الا لما تعمل فيه حادثة او تشوف فيه حادثة معتبره
انا عن نفسى عارف الطريق وحافظة الى حد ما وكنت مستعجل ومش عايز اخش من عين شمس فحبيت اخده لحد حديقة بدر من وراء كده تخريمة رغم غباوه الطريق بس بتوفر زحمة جامد
وكان معايا صديق لى وكان مشوار مهم واول ما دخلت الطريق قولتله اربط حزامك انت عارف ده طريق الموت (وده كان اسمه بين اصحابى فعلا) فربط حزامة بشكل تلقائى جدا وبدأت المعركة
حتى لو انت عايز تمشى فى حالك فى الطريق ده مش هتعرف تمشى بامان لان الطريق رايح جاى وكله بيجرى وفيه اماكن تعدى عربيتين مقابلين لبعض واماكن تعدى 3 واماكن تعدى عربية واحدة بس وكله بيفتكس وكله قلبه حديد واللى خايف يركب فوق الرصيف
انا مشيت لحد نص الطريق تمام وجت حتة فاضية شوية فسرحت على الدواسة لحد 70كم وسرحت فعلا سبحان الله لحد ما لقيت اللى قدامى بمسافة بيقف جامد فاخدت شمال منة وبدأت اهدى لقيت واحد واخد شمال من اللى قدامة برضو والتلاتة بيهدو علشان فيه مطب جامد وانا مستحيل اقدر افرمل خالص قبليهم خاصة ان الارض اسفلت وعليها تراب يعنى العربية مش هتقف ابدا وهتسحف بمزاجها ممكن تاخد العربيتين اللى قدامى بالعرض
وفى لحظة اخدت القرار الافتكاسى الرهيب بانى اعدى اللى قدامى وكنت فعلا عديتة وامرق كالصاروخ من الفتحة الصغيرة اللى بين العربيتين وده معناه انى هاخد المطب على الطاير بس يارب متعملش ساندوتش بين العربيتين
وفعلا عدلت نفسى بين العربيتين وهووووووووب طيرت من فوق المطب وانا باخد غرزة اطلع بيها ديل العربية من بين العربيتين فاخدت المطب على الطاير والعربية مش عدلة بس انا كنت مش مصدق انى طلعت من بين العربيتين من غير ماسمع طاخ او بوم بس اول ما نزلت العربية من على المطب عملت خمسة بعرض الطريق للتحول مقدمة العربية للخلف وتصبح مؤخرة السيارة فى اتجاه القادم من الامام على الطريق المقابل بشكل اذهل كل من على الطريق وخلى كل الناس تفرمل على الاخر لان المنظر كان بيوحى بعربية هتتقلب فى اى لحظة
لكن العربية متقلبتش ويادوب خبطت فى الرصيف بالعجل اللى ورا ووقفت بالعكس لكن سواق تاكسى كان جاى فى المقابل مقدرش يفرمل تماما ودخل فيا من ورا بوشة
بصراحة انا نزلت مخطوف ومش مصدق انى نزلت سليم اساسا بصيت على العربية من ورا لقيتها سليمة يادوب الاكصدام الفيبر اتكسر لكن الاسنفنج اللى تحتة والكمرة الحديد شالت الصدمة
اما التاكسى الرينو فكان الوش متطبق والريداتير ركب فوق الموتور والميه غرقت الدنيا ده غير الكبوت طبعا والصدر
دفعت للراجل 300 جنية فى ساعتها (وده اكبر مبلغ تعويض دفعتة حتى الان) ومشيت وانا مبسوط وبحمد ربنا انها جت على اد كده
اهم حاجة اتعلمتها من الحادثة ديه ان الطريق مش يمين وشمال وورا وقدام وبس فيه عامل طبيعة الارض ده مهم جدا وشوية ميه او رملة او مطب او حفرة ممكن يغير اى حسبة انت عاملها مهما كانت متقنة
|
alf alf shokra ya wa2el basha 3la elrad w elmotab3a
w 7mdela 3la slamtak ya basha m3 enha gat met25ar shwya
w adek edetna 7aga nestfeed beha ya basha
w rbena yostor 3la el kol