[محمدصلاح القاضى]

السلام عليكم جميعا

النهارده معايا تعديل لاى عربيه فيات 2 كامه وبتسخن فى الحر دا
والموضوع دا عشان اخويا وحبيبى ايمن ((AIMOO))
طبعا كلنا عارفين شكل ماتور عربيتنا وشكل دورة المياه فيه
ولذلك انا هتكلم مباشرة فى التعديل

اولا دى صوره مجموعه خراطيم المياه الواصله بين الريداتير وطرمبة المياه



وهى دى السبب فى المشكله كلها
طيب فى ناس هتسأل وتقول دا انت كلامك غريب اوووى
ارد واقول طبعا كلنا عارفين اتجاه دورة المياه فى الموتور من الريداتير من اسفل الى طرمبة المياه سم يأخد دورته فى الموتور متجها للخروج من اعلى عند الكوعه بتاع وش السلندر اللى شكلها عامل زى حرف ( T ) وبعدين تدخل الريداتير من فوق وهكذا
ودى شكل المجوعه اللى فوق عند وش السلندر



والمشكله كلها فى الناحيه اليمين لحرف ( T ) طيب ليه بقى
لان الخرطوم اللى واصل فيها متوصل مع الطرمبه فى الكوعه زى اول صوره ما شرحت بالظبط

وهنا بقى مربط الفرس زى مابيقولوا
كلنا عارفين ان الطرمبه المفروض انها بتسحب مياه بارده عشان تبرد الموتور لكن الخرطوم دا بيخليها تاخد مياه سخنه لانه متوصل على نفس الكوعه بتاعت المياه السخنه اللى خارجه من الريداتير وبالتالى تبقى الدوره شغاله بنسبة 50 % مياه بارده على مياه سخنه
ودا شكل الكوعه تانى عشان نفتكر مع بعض



وهنا بقى هنبدأ الشغل والتعديل

احنا هنجيب كاوتش داخلى ( شنبر ) بتاع عجله من عند العجلاتى ونقص حته مفيش فيها قطع او اى حاجه ونقص مسافه 5 سم / 10 سم وبعدين نعقدها من اى اتجاه ونجيب سلك رباط ونأكد على العقده ونربط عليها سلك رباط مره واتنين عشان متنزلش نقطة مياه سخنه
ودا هيبقى شكلها النهائى



كلنا شوفنا شكلها كويس
هبدأ نركبها على الفتحه بتاعت الكوعه فى الناحيه اليمين كل شغلنا فى الناحيه اليمين

بالشكل دا



طبعا هتبقى ضيقه على شفة الكوعه نوسعها براحه بالمفك لحد ما تركب كويس جدااا
بس خلى بالكم احين تنقطع وتبقى زى قلتها

وبعدين نركب الخرطوم تانى بالشكل دا وبرضه واحده واحده احسن تنقطع



كدا تمام ونكمل تركيب الخرطوم كويس جداا بالشكل دا



وبعدين نربط الكوليه الحديد تانى كويس جداا
زى الصوره



ونفتح غطا الريداتير ونزود مياه لو العربيه كانت سخنه ندورها ونزود مياه

وابقى قابلنى لو مسكت حراره
فى واحد هيقولى عربيتى مش بتسخن ومش معدل كدااا هقوله لو عربيتك بتسخن نص نص مع التعديل انسى السخونيه خالص
فى واحد هيسأل ويقول طيب ليه انت بتعدل فى حاجه اصليه وبتاعت العربيه وهى متصممه على كداااا هقوله برضه العربيات دى كانت بتيجى من ايطاليا وهناك كان الجو برد معظم شهور السنه وكانم بيحتاجوا ان العربيات تسخن عشان تستحمل البرد فكانوا بيصمموا المواتير بالشكل دا لكن عندنا هنا الجو مختلف تمام حر معظم شهور السنه

يارب اكون فيدتكم جميعا والتعديل دا والله من عندى انا مش من عند حد
ويارب اشوفكم بخير ديما ونتقابل على خير وفى الخير

ومنتظر استفسارتكم
والسلام عليكم ورحمة الله وبركاته