فك عدادات فيات 131 للتنظيف ومحاوله التعديل عليها
السلام عليكم ورحمه الله وبركاته
النهارده كنت فى مشوار وخلصته وبركب العربية وهروح لان معايا شغل اشتغله فى البيت لفت انتباهي لمبه منورة فى التابلوة ومكانها غريب جنب لمبه البطارية ( لمبه الدينامو ) و مش شوفتها قبل كده ولا اخدت بالي منها
فين وفين عرفت انها لمبه سخان الزجاج الخلفي
طب هيا ليه منورة دماغي لفت اكلم الكهربائية اللى اعرفهم محدش بيرد وقافلين مكملين الاسبوع اجازة
وبرضه الميكانيكيه نفس الحال
كلمت احمد فارما قال لي شوف لو فيه ليها فيوز افصله
دعبست لقيت علبه الفيوزات فيها مكانيين للسخان الخاص بالزجاج الخلفي فصلت اول فيوز وابص برضه اللمبه منورة طب افصل التاني برضه اللمبة منورة
طب وبعدين قولت لو قفلت هفصل كابل البطارية واريح نفسي
كلمت مهندس معايا فى الشركه قال لي اقف وانزل بسرعه افصل الكلبسات بتاعت الزجاج الخلفي لان السخان بيسخن الزجاج ومدام الزجاج مفيش عليه شبورة او مياه الزجاج هيجيله سرطان زجاج وفعلا عملت كده وبرضه اللمبة بنت اللذين لسه منورة
قولت بقي مش بدها اليوم ده مش مكتوب لي اني اشتغل
وقول بسم الله الرحمن الرحيم وبدئت افك العدادات اشوف ايه القصه و كنت خايف احسن اقطم كابل واير السرعه لاني قطمته قبل كده اثناء محاولتي فك العدادات فى مره سابقة
واثناء الفك لاحظت ان اللمبه كانت شوية تفصل وشوية تنور وده قبل ما افصل الفيش فتأكدت ان يكون فى تلميس او اللمبه معلقه فكملت علي بركه الله و طلعت العدادات
وقولت بالمره اشوف موضوع الساعه اللي مش بتتظبط من الزرار بتاعها دي
ودلوقت العداد اهه قاعد جنبي و هبدء الفك
وكنت عاوز بالمره اعمل سكان لخلفيه العدادات باستخدام سكانر او حاجه علشان لو عاوز اعمل شغل علي العدادات علشان اخلي الاضاءة من ورا الورقة بدل ما هيا من قدام كده
الخسائر لحد دلوقت اني ضيعت مسمار من اللي بيمسك العدادات فى التابلوة وده لاني كنت بفك العدادات فى الظلام
حد ينصحني بحاجه
ان شاء الله مش ناوي انظف العدادات واشوف اللمض اللى شغال واللي مش شغال واجربهم كلهم
|