السلام عليكم ورحمة الله وبركاتة
الموضوع زى ما مكتوب فى العنوان
هل فى علاقة بين كهربة الموتور(اسبراتير -بوجيهات بوبينة..الخ) وكهربة العربية (نور وكاسيت ومروحة ...الخ)
المشكلة كالاتى :
كان عندى مشكلة ان ال rpm بيوطى بتاع 300-400ار بى ام
مع اى حمل كهرباء لو فتحت النور مثلا او لو مروحة الردياتير اشتغلت وهكذا
جيت يوم الوقفة قرصت شوية على العربية فى مشوار كدة وجيت فى نص المشوار شميت ريحة شياط
ولقيت العربية بتنتش اكنها متلتة واتكتمت جامد ومهما ادوس بنزين ماتجمعش الا فى اخر الدواسة والسحب بقى فى الضياع
(انا شكيت انها جابت اسطوانة)
المهم بطلتها بتاع ربع ساعة كدة وجيت ادور غابت شوية فى الدوارة وصوت الموتور بقى عالى شوية وحاسس ان العربية متلتة (بس هى مش متلتة)
وحاليا صوت الموتور بقى عالى شوية و العربية سحبها احيانا يبقى كويس واحيانا يبقى زبالة وساعات تجمع سرعة عادى جدا وساعات تبقى بطة بلدى
المهم اناعارف دة عيب يأما بوجيهات او سلوك بوجيهات او بوبينة وناوى اغيرهم ان شاء الله
اللى محيرنى بقى ان بعد الموضوع دة ما حصل كهربة العربية اتظبطت
يعنى ال rpm مابقاش بيوطى مع تحميل الكهرباء مش عارف لية !!!
فهل فى تفسير علمى للى حصل
انا اللى اعرفة ان العيب اللى كان عندى فى كهربة العربية سببة اكيد يا كتاوت يأما فى حاجة فى الدينامو
انما اللى حصل ومش فاهمة
ان اول ما كهربة الموتور برجلت كهربة العربية اتظبطت ؟!!