رد: خليك أصيل وقول كلمة حق..دعوة لكل الأعضاء
الراجل كان جايبلنا العربية نتفرج عليها و صديق عزيز قصدني
علي أساس اني خبير عربيات اتفرج معاه عليها ،، ميعرفشي اللي فيها
طبعا العربية من بره حاجة جميلة جدا مش محتاجه كلام من أشيك العربيات في فئتها
اول ما دخلنا انبهرت طبعا بالحركات و الكارت و الاستارت انجين و المالتي فانكشن ، حاجات كانت نازلة في الميجان من سنين و دلوقتي بيفتخروا بيها في السيارات الحديثة
و الراجل قعد يعد في اوبشنز كتير أوي ، و هوا شخصيا علي قده فيها يمكن مش عارف كل امكانياتها
بس طبعا كلها اوبشنز جملة جدا ،، عجبتني منها الثلاجه الصغيرة اللي في الشنطة
القعدة مفيش كلام ،، الكرسي مريح جدا و يحتويك
تحسيسه بسيطه كده علي التابلوه ،، حسيت خاماته ممتازة من النوع الطري الظريف
العربية رغم انها عامله 35 الف كم بس مكنشي فيه حاجة مقشرة من جوه
علي عكس اللي سمعته ان الأجزاء السيلفر اللي فيها بتقشر
بس الصراحة حسيت قفلة الأبواب فيها مش قد كده ،، حسيتها تنتمي لقفلة فئات أقل من العربيات
اللي بتحس ان بيبانها خفيفة كده في ايدك ،، بتبقي مقبولة في الفئات الصغيرة لكن مش مقبولة في فئة الميجان
و الله أعلم ان شفت عيوب كتير في العربية اللي جربتها و احتمال كبير العربية يكون فيها حاجة أو عامله حادثة لأن فيها حاجات مش طبيعية
ابتدينا ننطلق ، اول حاجة حسيتها ان الفرامل استجابتها كويسة جدا ،
مشينا في شوارع عين شمس المدغدغه ، العفشة بسم الله ما شاء الله ،، ناعمة جدا
متحسش بحاجة
بس الأبواب ابتدت تطلع أصوات مزعجة ،، أكتر شوية من الأصوات الطبيعية اللي بتطلع من فيبر الدواخل اللي بتطلع في الشوارع المكسرة
الراجل صاحب العربية معرفشي يفسر حاجة و عمل نفسه عبيط
المهم طلعنا علي طريق داخلي بس مفتوح شوية ،،
و هنا كانت الصاعقة ،، العربية مبتسحبشي ،،
مبتسحبشي بمعني الكلمة ،، يعني من 0 : 50 كم ،،، دي تاخد وقت طوووويل
و الموتور فيه هزة لما تقرص علي العربية عشان تطلع اللي جواها
انا شخصيا اعتقد ان فيه حاجة في الموتور أو في الفتيس عشان العربية مش راضية تمشي
بس الحمد لله بعد وقت و بعد ما تضرب دواسة البنزين بالجزمة ،، العربية بتمشي و تنطلق شوية
و ده كان العيب الأساسي ، شخصيا ،، أعتقد ان العربية اللي جربتها فيها حاجة مش مضبوطة اطلاقا
معتقدشي ان ده الطبيعي
خدت لفة كده بتاع ربع ساعة في شوارع عين شمس و جسر السويس و مفيش جديد ينضاف غير اللي قولته
و صاحب العربية بيقول لأ هيا مفهاش حاجة
خليت واحد صاحبي يجرب و أكد نفس احساسي ،،، العربية مبتسحبشي و الموتور فيه رجه
طبعا مكنشي فيه فرصة لتجربة العربية علي السرعات و الكلام ده
هوا عموما صاحب العربية كان هوا نفسه بيردد كلام السوق دي عربية عايزه تحسيس و حساسه لأي شئ و قطع غيارها غالية و محدهش بيشتغل فيها غير في التوكيل ،، يمكن بيحاول يكون موضوعي
علي كلامه هوا جايابها من شهرين ب 105 ألف و عمل خمستلاف كم و دلوقتي جابتله في السوق 80 ألف جنية
العربية راشه اجزاء بره ،، بيبان و اكصطدام امامي و فيه كام كسره صغيرة في الفوانيس الخلفية و خبطات صغيرة و تجاريح في اجزاء متفرقة من البودي
أنا كنت بكلم بايوو ، بحاول اجيب منه نمرة حد من وحوش الميجان ،، شاركي أو ترونكي عشان يقولوا ابص علي ايه فيها أو لو يعرفوا حد مهتم انه عايز يجيب ميجان
|