- السلام عليكم ياعضاء المنتدى الكرام
- بداية كل سنة واعضاء المنتدى بخير
- ثانيا أحب اوجه شكر خاص ( للاستاذ محمد صلاح القاضى - الاستاذ هشام الجزار -Mr-astra ) على المجهودات الكبيرة والشغل المحترم اللى بيقدمموه فى المنتدى
أخش فى الموضوع انا عربيتى الحمد لله كنت مخلص شد العربية (سمكرة ودوكو)
المهم كنت قبل الشد غيرت صلايب كردان وساعدنى فى الموضوع ده الاستاذ الكبير هشام الجزار
غيرت ساعتها زيت كارونة وكانت عندى الكرونة الحمد لله والفيتيس حالتهم جيدة جدا وأكدت عالعامل انا هغير زيت 140 وملحقتش امشى بالعربية لأنى كنت واقف فى اشارة وفجاة لقيت طاخ فى اشارة وراجل كبير لسة بيتعلم السواقة شيعلى الاكصدام المهم لما لقيت منظر الاكصدام كده قولت اشد بالمرة
المهم بعد ما خلصت الدهان ومشيت بالعربية ظهرت معايا ونة خفيفة ولأنى كنت وقتها مظطر اسافر بالعربية ماحطتش فى دماغى ومكملتش ايام ولقيت الصوت على وبقى ملحوظ قولت لما اخلص سفريتى ارجع اغير الزيت وانا راجع من السفر كان الصوت فضيحة رحت على ميكانيكى صاحب والدى ونزلت الزيت واذا افاجأ ان الزيت نازل زى البنزين (الزيت مكانش مشى 2000 كم على بعض) المهم اشتريت زيت 140 وغيرناه رحت لبتاع البنزينة وقولتله انا عايز اغير زيت 90 قالى (من عينى )ومن نفس الطرمبة اللى قالى عليها 140 قالى هو ده 90 بعد ما سألته تانى قالى ان احنا هنا مابنجيبش 140 قولتله ممكن اشوف الزيت ورانى عينة من الزيت واذا بالصاعقة الزيت اللى بيغيروه أقل لزوجته أقل من زيت الموتور وطبعا ده اللى شيع عندى الكرونة مادريتش بنفسى غير وانا بديله بوكس فى وشه والناس حاشونا وبعدها عامل من هناك قالى ان الزيت اللى فى الطرمبة ده زيت فيتيس بتاع العربيات الربع النقل ودى زيت الفيتيس بتاعها بيبقى لزوجته زى زيت الموتور واتأكدت من الكلام ده من واحد معايا فى الشارع معاه دبابة
طبعا انا عارف انى طولت قوى المره دى بس انا كنت مخنوق زجايب اخرى من البهايم اللى شغالين فى البنزينات والغش اللى بيتم
الكرونة عندى من ساعتها فضيحة لما السرعة توصل 70 ومبقتش قادر استحمل الصوت ولسه كنت خارج من شد فعايز أعرف تكلفتها كام والاستيراد فيه حالات كويسة ولا بختك يابو بخيت
نصيحة أخيرة (اشترى انت الزيت وخلى بتاع البنزينة يغيره وخليك واقف على ايده وخليه يديك باقى الزيت عشان ميحصلكش لقدر الله زى ما حصل معايا )