[Tota El Masry]

- يعني لما قبل ما تحصل مشكلة لأخوك و لا زميلك تنبهه
- يعني لما تلاقيه وقع فعلاً مش تنفخ بقى في النار لأ تحاول تصلح الغلطة لحد ما ربنا يكرمه و ترد غيبته و الغيب حجته معاه
- يعني تعلم الخير و ترميه البحر(والله و عن تجربة إن عمت يحرسك بامر الله و إن غرقت ينجيك إلا ماشاء الله)
- يعني تتبرع من وقتك و تذاكر لزميلك في الشغل علشان ياخد مؤهل جامعي و يوسي حالته بلاش يا سيدي فلوسك و لو إنها صعبة إلا على من رحم ربي أو تديله كتبك بتاعت الكلية يذاكر فيها
- يعني تنصحه لوجه الله طالما إنه مش بياذيك قصاد كل خدمة أو نصيحة و ياخد المعلومة و ينسبها لنفسه(صعبة حبتين لو حد عمل معاك كده صح) و لو حتى باع و اشترى على حسك مسيره مش حيلاقي حد يسرق افكاره و حيحصله إفلاس و ينكشف ثم إنك منتظر أجرك من ربنا و الدين النصيحة
- يعني تنقي اجمل هدوم سليمة عندك و تديها لحد محتاج أو مسكين (خللي بالك المسكين من يملك لكن ليس لديه ما يكفيه و راجع تفسير سورة الكهف لصحاب السفينة-كانت لمساكين يعملون بالبحر) و تقول له يا سيدي حظك حلو و أنا بشتري لنفسي عجبوني و كنت اقل و لا اكثر من كده في الوزن و قعدوا في الدولاب و طلعوا من قسمتك تعالى نتوؤم في العيد أنا و أنت
- يعني لما تلاقي عندك بواقي أدوية صالحة للإستخدام ترجعها للصيدلي يديها لحد فقير أو يدلك على حد تكفل جزء من علاجه معاك(بذمتك صيدلية الطوارء عندك بتيجي ناحيتها كام مرة في السنة ممكن أغلب إللي فيها صلاحيته ينتهي و صلاحية الخير عندك تنتهي و أنت خايف يحصل ظرف طارق"توكل على الله مش حيجيلك طاريء" و طلع أي دواء باقي عليه من 6-3 شهور و مش محتاج له تاني
- يعني لما توفر كوباية من خرين البيت من النواشف كل اسبوع و لا أسبوعين مرة (دقيق - سكر- علبة شاي 50جم - بقية زجاجة الزيت - علبة سلامون - مغلف حلاوة بار -.......) و تديها لأسرة محتاجة و لعب أولادك القديمة السليمة (و لو إني اشك ربنا يهديك الولاد) و كتبهم الدراسية القديمة و اي حاجة حالتها جيدة حتكون صدقة عن الشخص و الشيء إللي زكيت عنه لأن خللي بالك ابواب الخير مش حتستناك و زكاتك ممكن المحتاج يستغني عنها بكرة من فضل الله و باب العمل الصالح يخلص و الحسنات إللي يذهبن السيئات رصيدهم مش حيزيد ربنا يعافينا
- يعني مش حطول عليك الخير مش حتغلط فيه عنيك و علشان تلحق تقوم تفكر ممكن تعمل إيه خير النهاردة أو تخطط للخير (لأن الخير مشروع كل ما تديه يديك و أكثر)

تبقى أنت كده تفاحة 500%
لأ
أنا طمعان في وجه الله و عاوز ابقى 1000% إللي قلتي عليها

يبقى يا حلو
تدل على فعل الخير كمان

هيص يا عم
بضربة واحدة ممكن توصل 500 X ضعف 70 والله يضاعف لمن يشاء يعني تبقى شجرة...لأ قول جنينة تفاح
يعني زي ما قلتلك في الأول 1000% و زيادة يعني رخصة دولية بجدارة من غير نادي السيارات

و يا سلام لو معاهم حبتين صدق نوايا

يا عم ده رخصة كونية من ربنا سبحانه و تعالى طول ما أنت في معيته
ربنا يصلح حالك و يدمها علينا نعمة قول آمين