[hazem_khidr]

اهم حاجه في شراء السياره المستعمله اساسيات السياره
بمعني حوض الموتور يكون بويه فابريكه كذلك الشنطه و القوايم و جميع الاساسيات
و يكون الفروق بين الابواب متساويه و صاج العربيه ماشي منسجم مع بعضه
و البويه الخارجيه تكون مش مموجه و كلها حته واحده.

تاني حاجه تبص عليها منظر الصالون و يا تري متبهدل ولا لاء
لان صالون العربيه بيعكس مدي نظافه صاحبها و هو مهمل في العربيه عموما او لاء
و لو لقيت الصالون زي فرش الابواب و التابلوه و الكراسي متبهدله و متكسره ما تشتريش العربيه دي
حتي لو اساسيتها سليمه لان الحاجات دي بتتكلف كتير علشان ترجعها لوضعها.


بعد كده تبدأ تشوف الموتور بتاع العربيه يا تري صوته حلو ولا لاء
و فيه صوت ترزيع او صوت تخبيط او صوت خشونه و يا تري لون العادم ابيض ولا اسود
و فيه نفخ طالع من الفايظ ولا لاء.
و بعدين تشوف نقلات الفتيس كلها بتيجي بسهوله ام لاء و يا تري فيه نقله مش بتيجي او الفتيس بينطر منها
و تمشي بالعربيه تسمع صوت لو فيه ونه او لاء و يا تري فيه اصوات تخبيط و شخشخه ولا لاء؟؟
و اخيرا تبص علي حاله الكاوتش النقشه باينه ولا محتاجه كاوتش ولا ايه حالته بالضبط
يا تري كل فردتين قدام بعض نفس النوع و النقشه ولا لاء و هكذا.

ممكن تنزل من سعر العربيه في حاله لقيت عيوب من رقم اتنين و انت نازل.
اما لو اساسيات العربيه مش مضبوطه و ملعوب فيها يبقي ابعد عن العربيه دي خالص