السلام عليكم:
بص يا سيدي .. من حوالي اربع او خمس سنين كنا مسافرين من الكويت لمصر عن طريق البر بالعربية بتاعتنا شيفروليه كابريس 1993\94 اتوماتيك فول ابشن, نزلنا ميناء نويبع و خلصنا الاجراءات الروتينية المملة و طلعنا بالعربية متوجهين للقاهرة عن طريق اطريق الدولي - مكناش نعرف ساعتها الدولي الساحلي - وسط الجبال طريق مكسر مفهوش اي خدمات و لا اي حاجة ,, و بعد شوية لاقينا العربية بطلع دخان كثيف و الناس الي كانو معانا هما الي نبهونا عن طريق الفليشر ....
وقفنا بالعربية و نزلنا والدي حاول يبطل العربيةلكن المفاجئة هنا ان الكونتاكت علق العربية مبطبطلش ............
و ده خطر على العربية , فاطرينا اننا نفصل البطارية خالص , و استنينا حد يشدنا , لان العربيات الي معانا معاها حمولة زائد حمولة عربيتنا يعني هيبقى في خطر على العربيات التانية
المهم لقينا عربية مستوبيشي لانسر وقفت نزل منها راجل بدوي , و قلنا ااقرب ميكانيكي هنا في منطقة (( نخل)) على بعد 50 ل 60 كيلو متر استنينا لغاية ما نلاقي لوري كبير يكون معدي يشدنا و الحمدلله لقينا,,,,
ربطنا العربية باللوري و هنا المشكلة التالتة تظهر بعد ما فصلنا البطارية الفرامل مبقتش شغالة لان نظام العربية كله معتمد على كهربة البطارية ,,,, فكانت محتاجة حد اعصابه ثابتة عشان الطريق و منحنايته الكتيرة , نزل مساعد سواق اللوري و ركب عربيتنا ووالدي معاه و انا نزلت ركبت عربية واحد من الناس الي معانا و اخواتي و والدتي في عربية تانية ,,, و عيش بقى كل واحد فيهم معاه عياله يعني ازمة على ازمة , مشينا في الصحرا حوالي 5 ساعات لغاية ما وصلنا نخل , و توجهنا للميكانيكي , الميكانيكي شاف بص قالك زيت البوكس بتاع الجير نزل كله لان البوكس اتخرم ... لازم تتشد للقاهرة ... عيني علينا و على العربية ,,,, جبنا ونش عشان يشد العربية مع العلم ان الونش ده مكنش مناسب لحجم العربية فاطرينا نشيل العجلتين الي قدام عشان يعرف يشد , و بعد رحلة عذاب قاسية و صلنا القاهرة - بنت المعز - عشان تبدأ الرحلة التانية الي هي ((مين بيصلح اتوماتيك في مصر ))
قالك شوف منصور شيفروليه , روحنا منصور شيفروليه قابلنا مهندس هناك , تقريبا مهندس اختبار سيارات
قالنا هنا في منصور مبيصلحوش بيرمو القديم و يغيرو , و هيقولو ليك هنغير ترمبة بنزين ترمبة ميه ترمبة العفريت الازرق , يعني هيدخلوك في بتاع 10 الاف ج ,
المهم ادانا عنوان ميكانيكي شاطر بيصلح اتوماتيك روحنا هناك , و لقينا رفيقات لسيارتنا الحبية فيها نفس المشكلات
و في النهاية الحمدلله اتصلحت و انتهى الموضوع على خير , بس بصراحة كان احساس صعب و انا شايف العربية عاملة زي القتيلة لا بتشتغل لا فرامل و لا حتى نقدر نزقها
اسف على التطويل و على الحكاية المملة الصعبى دي , بس هو ده موضوعنا ((
ماهو اليوم الذى تعطلت فية سيارتك ولن تنساه؟))
و انا فعلا مش هنسى اليوم ده
