السلام عليكم و رحمه الله
اولا : كل سنه و انتوا طيبين جميعا بمناسبه رمضان
ثانيا :انا متابع المنتدى من فتره كبيره و بصراحه ماشاء الله , اكبر و احسن منتدى للسيارات شفته , و الى خلانى انضم ليه انى عاوز اكتسب خبرات من الناس اللى هنا لانى بصراحه شايف عبااااااااقره مصر فى العربيات كلهم هنا
ما علينا عشان مش عاوز اطول عليكوا كتير
انا بدور على عربيه , وبصراحه دى هتبقا اول عربيه بتاعتى انا ...فمحتار حيره ما بعدها حيره
بالنسبه للمواصفات اللى بدور عليها فأنا من الناس الى بهتم بشكل العربيه , يعنى تبقا شبابيه و سهل التعديل فيها .. مش بحب العربيات الضخمه او الكبيره اوى ... اداء العربيه على الطريق برضو مهم بالنسبه لى ( مع انى مش هسافر بيها كتير ) .. و يفضل انها تكون اتوماتيك .. و اهم حاجه تبقا قطع غيارها سهله و متوفره و ماتدوخنيش
بالنسبه للميزانيه فأنا لحد 45 ( ممكن تزيد شويه لو عربيه تستاهل بس ماقدرش اعدى ال 50 )
انا سمعت نصايح من ناس كتييييير اوى و شفت عربيات كتير بس بصراحه احترت بينهم ... فيه ناس نصحتنى بالجولف 2 كعربيه صغيره و شبابيه و قويه .. و ناس نصحتنى بالسيفيك 93 ( و انا جربتها قبل كده و من احسن العربيات الى سوقتها فى حياتى ) دا غير انها شبابيه برضو و تحفه .. بس قطع غيارهم هما الاتنين الناس خوفتنى منهم اوى
و ناس قالتلى على الستارليت ... و ناس قالت اكسنت ... و ناس قالت لانسر كريستاله ...
المهم انى سمعت كل الحكايات اللى ممكن تتصوروها , لحد ما قربت اتجنن
فقلت استشير الخبراء اللى هنا يمكن الاقى الحل عندكوا .. و ياريت الاقى الحل يبقا جزاكم الله كل الخير
.. مستنى نصايحكم