السلام عليكم
النهارده وكالعاده كنت بعمل متابعه
للحاجه بعد العمليه ومن حظى الحلو او الوحش
كل يوم سبت لازم تحصلى مشكله فى اليوم ده
لانى وبلا فخر بأكون فى معقل الزحمه
وأشد الاماكن سخونه فى مصر وإلتهاباً
فى مستشفى قلاوون
متفرعه من شارع الازهر
وطبعاً اول شىء الحاجه بتنزل من العربيه
وتستنانى أركن وده هم لوحده
مره ارجع من المستشفى الاقى استيكر مخالفه تعطيل حركة المرور
والنهارده والحمد لله كنت هاخد مخالفه سير عكس الاتجاه واللى مزعلنى انى قلت للصول
انى غريب مش من هنا وانى
مش عارف ان الطريق عكس
وبصراحه وده اللى مضايقنى جداً
انى فضلت احلف انى ماعرفش
وصول المرور قالى والله انا مش هاكتبها علشان خاطر الحاجه
بس انا لسه متضايق جداً
وفضلت طول الطريق ازعق لنفسى
انها سولت لنفسها تمشى عكس
وقلت يا خسارة الكلام اللى الواحد
بيفضل يقولو للناس وهو مش بيعمل بيه
وأمى تقولى يابنى خلاص
وانا اقولها
أصلى انا كنت عارف انى ماشى عكس
وحلفت انى ما اعرفش
ودلوقتى كل اللى اقدر اقوله
انى حاسس انى صغير قدام نفسى
ومنافق كمان
وعلشان كده انا كتبت الموضوع ده
لسببين اولاً افضح نفسى فى المنتدى
ثانياً علشان غيرى ما يعملش كده
ويبقى صغير قدام نفسه