مع احترامى لوجهة نظر حضرتك.... موضوع سنة انتاج موديل العربية مالوش علاقة اطلاقا بنوع البنزين المستخدم
الفرق فى ايه.....؟؟؟؟؟؟
كل ما رقم الاوكتان زاد 90-92-95 كل نسبة الشوائب تقل بمعنى ان بنزين 80 بيحتوى على نسبة شوائب .. تمام؟؟
من ناحية تانية عندنا العربيات نوعين "كربراتير و انجكشن" واعتقد ان عربية حضرتك كربراتير وهنا ييجى دور سنة موديل العربية يعنى اغلب العربيات موديلات تسعينات بتبقى كربراتير
الفرق بين الكربراتير والانجكشن ان الانجكشن يحتوى على رشاشات "حاجه زى الفونية بتاعة البواجير والبوتاجاز كده" ودى اللى تخرج البنزين من التنك بقدر معين تديه للموتور حسب الحاجه عشان الاحتراق يتم وبالتالى لو البنزين نسبة الشوائب فيه عاليه زى 80 كده الرشاشات دى كل شوية هاتتسد وتحتاج تتنضف يعنى يفضل بنزين ذو اوكتان عالى 90-92-95 للعربيات الانجكشن
اما الكربراتير ماتفرقش معاه لان البنزين بيمر من خلال فتحات "ابواب" الكربراتير فا مهما كانت الشوائب كتير من بنزين 80 مش هايأثر فى حاجه وان كان برضه لازم متابعة نظافة الكربراتير بصفة عامة كل فتره
وبناءا عليه "زى مجلس الشعب كده" لو عربيتك كربراتير يبقى وفر على نفسك وحاول تمون 80 ولو فى امكانية تدفع اكتر من كده يبقى 90-92-95 زى بعضه لكن هاوفر عليك زحمة الطوابير بالنسبة لبنزين 80
ولو عربيتك انجكشن يبقى الافضل طبعا تبتدى من 90 وانت طالع حفاظا على نظافة الرشاشات
طبعا دى وجهة نظرى مش اكتر وان شاء الله الخبراء يفيدوا حضرتك اكتر منى
