[Vanditta]

اللى بيتغير دة بيتوقف على حالة العربية اللى حضرتك مشتريها
بس فى حاجات لازم تتعمل مهما كانت حالة العربية كويسة
زى مثلا
1-طقم سيور (سير كاتينة -سير دينامو-سير تكييف ان وجد)
2-طقم فلاتر (فلاتر بنزين - فلتر هواء )
3-غيار زيت مع تغيير الفلتر
4-تشيك على مياة البطارية لو( سائلة )
5-تشيك على دورة التبريد من خراطيم وردياتير ومروحة واصلاح ما يلزم اصلاحة
6-طقم بوجيهات ويفضل من نفس النوع المقرر للسيارة ودة بيبقى يأما فى الكتالوج او مكتوب تحت الكبوت او تبحث عنة على النت
7-شيك على كارتيرات الفجاوى امامية وخلفية وتغييرها اذا كانت حالتها سيئة لتفادى حدوث بارومة لاقدر الله


دى اهم حاجات لازم تعملها اول ما تشترى مستعمل لتفادى حدوث اى مشاكل لا قدر الله
بعد كدة مع الوقت حضرتك هتكتشف بعض العيوب الموجودة فى العربية واللى المالك القديم ماصلحهاش وهتبدء تعملها واحدة واحدة حسب اولوية اهميتها وحسب ظروف حضرتك المادية

زى مثلا

بالنسبة للعفشة
تشيك على المساعدين بالنظر كدة لو فى مساعد ضارب زيت ولا حاجة بيتغير لانة بيئثر على باقى مكونات العفشة
روح ظبط زوايا ورصص وهناك بتاع الزوايا هيقولك اية الشغل اللى المفروض تعملة فى العفشة سواء بقى مقصات ولا جلب ولا علبة دريكسيون ....الخ

بالنسبة للفرامل
بتشيك على الزيت وتزودة لو ناقص
ولو التيل متأكل يستحسن تغيرة وتبدء على نضيف
وتشيك على الهاند لو ضعيف ولا مابتمسكش بتعمل رجلاش او بتغير تيل خلفى لو متأكل
لو الفرامل محجرة بتكشف على السرفو يمكن يكون محتاج طاقية ولا حاجة مثلا

بالنسبة لكهربة العربية

حضرتك بتشوف اية اللى مش شغال(انوار - اشارات- كاسيت - مساحات - .......الخ) وبتروح لكهربائى يظبطة وغالبا ما بيبقى العيب بسيط سواء فى (القواطيش - كتاوت - فيوز - ارضى مهرب )
وبتكشف على شحن الدينامو -وتشوف لو العربية بتعتل او بتصرخ فى الدوارة يبقى تكشف على المارش ممكن يكون محتاج جلب او تغيير اوتوماتيك او ترس بندكس


الكلام دة كلة طبعا مابيكونش موجود مرة واحدة انا حبيت بس اجيب لحضرتك معظم العيوب اللى بتبقى موجودة فى السيارات المستعملة حسب طلب حضرتك (بالتفصيل)

وبالتوفيق ان شاء الله