[zing0]

السلام عليـــكم
جهزت ورقى إمبارح بالليل و توكلت على الله و صحيت صليت الفجر و نزلت غسلت العربية و سخنتها و أخدت الحاج (والدى) و رحت المرور( مرور المعادى)
طبعاً أنا رحت على المقر القديم. لقيته أتغير و بقى فى زهراء المعادى, فضلت أسأل أى حد أقابله و إضطرتنى الظروف أنى أتوه......
لقيت نفسى طلعت من شارع جانبى على الأوتوستراد !!!!!
المهم , ربنا رزقنى بعربية شرطة تابعة للمرور سألتهم المرور فين و دلونى, و طبعاً كان لازم أدخل الأوتوستراد و أمشى لحد اليوترن اللى عند مطلع الدائرى و أرجع تانى
المهم أنى جديد لانج فى السواقه و لحد الآن بخاف أمشى على الكورنيش !!!
توكلت على الله و مشيت جنب الرصيف و سايب الطريق الواسع للى عاوز يجرى و فجأة.....
ظهرت عربية نقل رخام ( من اللى شغالين فى شق الثعبان) و راحت طالعة من ورايا بسرعة و كسرت عليا و أنا جنبى الرصيف و لقيت نفسى بتشد تحتها
بيييييييييييييييييييييييي يب و حاسب يا عم و طبعاً كسرت على الرصيف عالآخر
تقريباً الراجل نعس و هو سايق و بفضل الله جنب العربية أتبهدل + المرايه أتكسرت
بس الحمد لله إننا لسه بخير
بس طبعاً مش هقولكم كنت رايح الإختبار حالتى عاملة إزاى ... ده أنا تقريباً جالى تبول لا إرادى
بس بصراحة لما رحت المرور لقيته فاضى و شفت الإقماع لقيتها واسعة و حلوه و مفيش إختبار نظرى و الموضوع مريح, أنا بس كنت زهقان من الإنتظار للإمتحان.
و أخيييييييييييراً ... سمعت موظف الشباك بينده على إسمى و يقولى وقّع و إستلم و على البيت على طول
بالنسبة للرشاوى و الوسايط: طبعاً موجوده بس على شكل حلاوه و أكرامية و شاى , يا إما هيتلككوا على الورق, بس كده كده هتمتحن.

الحمد لله على كل حال و ربنا يحفظنا و يسلمنا