[Dr. Bolbolan]

ذهبنا للتدريب فى المستشفيات وكنت قرفان انى ح أروح مستشفى تانى ! وكل اتنين فى مجموعه وطبعآ حظى جاء

مع الفليبينى والحمدلله ! رغم انه رخم بس أرحم من ناس تانيه ! وأول يومين كان تدريب فى العنايه المركزه !

أنا فوجئت والله من التصميم الانشائى ومن النظافه الفائقه والرعايه الحقيقيه والطب والعلم يطبق على أصوله !

و تركوا لنا حرية التحرك والسؤال عن أى شىء وحتى الخروج والدخول للقسم بدون اذن ! رغم ان الدخول

برده بكارت الكترونى ! يعن كنت أخرج فى الهواء أشرب سجائر وأتحدث مع المزز ثم أرجع أقف حنب باب

القسم حتى أجد ممرضه داخله أو خارجه المهم تفتح الباب علشان أدخل ! وبالداخل الشغل كله للممرضات

ستات و مساعدين رجاله والدكاتره تحضر مره واحده للمرور صباحآ للكشف واعطاء التعليمات وكل حاجه

بعد كده تمشى أوتوماتيك لوحدها ! وكل مريض أمامه ترابيزه مثل ترابيزة رسم المهندسين وعليها شارت

ضخمه ويكتب عليها كل معلومه كبيره أو صغيره للمريض وتتغير يوميآ ! وكل مريض حوله من الآجهزه

لوحده ماليس موجودآ عندنا فى مصر بغرفة عمليات كبرى ! وحضر الآطباء وكان بعضهم لطيفآ والآخر ينظر

لنا كجسم غريب وأحدهم كان يضع طاقية اليهود فابتعدت عنه تلقائيآ ! وبعد ساعتين كنت عرفت كل حاجه وابتديت

أتجول فى المستشفى للتعرف عليها ! مستشفى ضخمه فخمه وليست بالمجان وأجور العلاج عاليه جدآ والمرضى

وأهلهم والعمال فى قمة الظرف والآدب والسيكيوريتى رجال ونساء على كفائه عاليه ! وأول حاجه سألت عليها

عن مكان للصلاه للمسلمين ووجدت فعلا حجره مخصصه لذلك عباره عن متر فى متر و نصف وبها حوض للوضوء

و بضعة مصاحف وأدعيه بالانجليزيه والآورديه ! وبعدين جلستى طول النهار على باب المستشفى فى المنطقه

المخصصه للتدخين وبها تعرفت على ناس كثيره ستات وبنات ورجال مرضى وغير مرضى وكلهم يتحدثون

معك ببساطه وسعداء جدآ عندما يعرفون انك مصرى ! واكتشفت ان مصر بالنسبة لهم حاجه كبيره جدآ جدآ !

مما أثلج صدرى وبعد ما أخلص تدخين أدخل الريسبشن حيث أتفرج على خلق الله وكأنى فى فندق 5 نجوم !

وفيما يلى بعض الصور من على باب المستشفى حيث أن التصوير ممنوع بداخلها ! ( يتبع ) !



المنظر الخارجى من على باب المستشفى !



مزز قادمه للمستشفى ( طبعآ التصوير من بعيد بدون ادراك منهم ) !


فلتحيا جنوب أفريقيأ ( أنا حبيت البلد دى قوى ) !



بدون تعليق !



رجل مسلم و زوجته ( تكلمت معه واتضح انه انجليزى لكن زوجته أشك من شكلها ولبسها انها من دكرنس دقهليه ) !



جنوب أفريقى مسلم من أصول هنديه !



هل تصدق ان اللقطه دى من جنوب أفريقيا ؟؟



اللقطه دى لمزه شعرها عجبنى جدآ ولم ترانى أثناء التصوير و بعد ساعه جلست معها شخصيآ لمدة ساعتين
حيث اتضح أنها رئيسة قسم الآشعة المقطعيه وعاملتنى بلطف و ذوق كبير جدآ !



سيارات اسعاف تبع المستشفى ( مجهزه أحسن تجهيز ) !



يافطه حضاريه أعلى صندوق مثبت على الحائط والآرض وبه سم للفئران وما شابه ( حتى يعرف الناس ماهذا )

والباقى غدآ ان شاء الله و كل عام وأنتم بخير !

Dr. Bolbolan